آئی پی ایل 2020: میچوں پر فکسنگ کا سایہ، اے ٹی ایس جانچ میں مصروف

سری گنگا نگر: راجستھان کے اے ٹی ایس ونگ کے ذریعہ جے پور اور ناگور میں کرکٹ سٹے بازوں کے ایک بڑے بین ریاستی گروہ کا پردہ فاش ہونے کے بعد متحدہ عرب امارات میں کھیلے جا رہے آئی پی ایل ٹورنامنٹ کے میچوں پر فکسنگ کے خدشات پیدا ہوگئے ہیں۔ ذرائع نے آج بتایا کہ ایس او جی نے اس خدشے کے پیش نظر پکڑے گئے سٹے بازوں سے آن لائن ہو رہی سٹے بازی کی جانچ شروع کر دی ہے۔ اے ٹی ایس نے ان لوگوں کے رابطے بیرونی ممالک سے ہونے کے خدشات ظاہر کیے ہیں۔

واضح رہے کہ رابطے کے ذرائع کی بنیاد پر کئی دن تک خفیہ طریقے سے جانچ کرکے گزشتہ رات اے ٹی ایس نے ایک بڑا آپریشن چلایا، جس میں کل 14 افراد گرفتار کیے گئے۔ راجستھان کے جے پور، ناگور میں گرفتاریاں کی گئیں۔ وہیں نئی دہلی اور حیدرآباد میں بھی سٹے باز پکڑے گئے ہیں۔ اے ٹی ایس ذرائع کے مطابق دیگر ریاستوں کے لوگ راجستھان آکر شناخت بدل کر سٹے بازی کر رہے تھے۔ ان کے آئی پی ایل میں سٹہ لگانے کی اطلاعات مل رہی تھیں۔

وہیں گجرات کے راجکوٹ تعلقہ علاقے میں کرکٹ پر سٹا کھیل رہے دو لوگوں کو گرفتار کیا گیا ہے۔ پولیس نے پیر کو بتایا کہ اے جی چوک کے نزدیک موبائل فون سے کرکٹ میچ پر سٹا لگا رہے دو لوگوں کو اتوار کی دیر رات گرفتار کرلیا گیا۔ وہ دہلی کیپیٹلس اور ممبئی انڈینس ٹیموں کے بیچ چل رہی آئی پی ایل کرکٹ میچ پر سٹا لگا رہے تھے۔ ان کی شناخت شکتی سوسائٹی شیری-4 کے رہنے والے جگدیش بھائی سولنکی(34) اور چمپک نگر -4 کے رہنے والے جے راج سولنکی(32) کے طور پر ہوئی ہے۔ ان سے 750 روپے نقد سمیت 18000 روپے کا سامان برآمد کیا گیا ۔