آئی پی ایل 2020: کوالیفائر 1 میں ٹیم کی کارکردگی کو روہت شرما نے بتایا 'سب سے بہترین مظاہرہ'

دبئی: ممبئی انڈینز کے کپتان روہت شرما نے کہا کہ چھٹی بار جمعرات کو یکطرفہ طور پر آئی پی ایل کے پہلے کوالیفائر میں دہلی کیپٹلز کو 57 رنز سے شکست دینے کے بعد ٹیم نے اس میچ میں اپنی سب سے بہترین کارکردگی کا مظاہرہ کیا۔

دفاعی چمپئن اور چار بار کی فاتح ممبئی نے جمعرات کو 20 اوور میں پانچ وکٹ پر 200 رن بنائے اور دہلی کو 20 اوور میں آٹھ وکٹ پر 143 تک محدود کردیا۔ ممبئی نے اس طرح چھٹی بار فائنل میں جگہ بنالی۔ ممبئی نے اس سے قبل 2010، 2013، 2015، 2017 اور 2019 میں فائنل میں جگہ بنائی تھی۔

دہلی کے لئے اس شکست کے بعد پہلی بار فائنل میں جگہ بنانے کی امید ابھی ختم نہیں ہوئی ہے۔ دہلی کا مقابلہ 8 نومبر کو ہونے والے دوسرے کوالیفائر میں سن رائزرس حیدرآباد اور رائل چیلنجرس بنگلور کے مابین ایلیمنیٹر کی فاتح ٹیم سے ہوگا اور یہ میچ جیتنے والی ٹیم 10 نومبر کو فائنل میں ممبئی سے مقابلہ کرے گی۔

روہت نے میچ کے بعد کہا کہ میرے خیال میں یہ بہترین کارکردگی تھی۔ میرے جلدی آؤٹ ہونے کے بعد کوئنٹن ڈی کوک اور سوریا کمار یادو نے شاندار بیٹنگ کی۔ نتیجہ ہمارے لئے بہت اچھا رہا۔ ہمارا کوئی منصوبہ نہیں تھا۔ ہم ایک مختلف ٹیم ہیں اور ہم مختلف انداز میں کھیلتے ہیں۔ ہم چاہتے تھے کہ ٹیم پاور پلے میں بہت عمدہ پرفارمنس دے کر میچ ان کے حق میں کرے۔

روہت شرما نے کہا کہ ایشان کشن بہت اچھی فارم میں ہیں اور ہم چاہتے تھے کہ وہ مثبت کھیلیں۔ ہم نے کرونال سے کہا کہ وہ مثبت بیٹنگ کریں اور بولرز کو دباؤ میں رکھیں۔ بمراہ اور بولٹ بہت عمدہ فارم میں ہیں۔ دونوں نے مختلف ٹیموں کے خلاف کھیلا ہے، اس لئے ان کے مختلف منصوبے ہیں۔ ایک ٹیم کی حیثیت سے ہمارے پاس مختلف منصوبے ہیں اور انہیں کامیابی میں دیکھ کر بہت اچھا لگتا ہے۔