جسٹس لویا پر آج دیا گیا فیصلہ عدلیہ کی تاریخ کا یومِ سیاہ: جسٹس کولسے پاٹل

مجھے لگتا ہے کہ ہندوستانی عدلیہ کی تاریخ میں آج کا دن سب سے تاریک اور برے دنوں کی شکل میں یاد کیا جائے گا۔ میری سمجھ میں ایسا کوئی بھی نہیں کہہ سکتا اور نہ ہی کہنا چاہیے کہ جسٹس لویا کی موت قدرتی تھی۔ سارے دستاویزات موجود ہیں، کم از کم ان کی جانچ ہونی چاہیے تھی۔ مطالبہ یہ تھا کہ اس موت کی جانچ ہو، اگر اس کی بھی سماعت نہیں ہوگی تو کیسے چلے گا۔

دیکھیے، 12 جنوری کو سپریم کورٹ کے چار ججوں نے تاریخی قدم اٹھایا۔ ایسا ہندوستان کی تاریخ میں کبھی نہیں ہوا تھا۔ انھوں نے پریس کانفرنس کر کے سیدھے سیدھے کہہ دیا کہ سپریم کورٹ میں جو چل رہا ہے وہ درست نہیں ہے۔ انھیں جسٹس لویا والے معاملے میں سپریم کورٹ کے رویہ سے ناراضگی تھی۔ اتنا ہی نہیں، 100 سے زیادہ ممبران پارلیمنٹ صدر جمہوریہ سے ملے تھے اور کہا تھا کہ انھیں چیف جسٹس پر بھروسہ نہیں ہے۔ یہ امت شاہ سے جڑا کیس ہے، لہٰذا اس سلسلے میں زیادہ شفافیت برتی جانی چاہیے تھی۔

دیکھیے، دستاویز تو آج سامنے ہیں۔ دلائل اپنی زبان بولیں گے۔ لویا کے گھر آئے فون کا وقت اور پوسٹ مارٹم میں درج موت کے وقت کو دیکھ کر جو کچھ سامنے آتا ہے اسے فراموش نہیں کیا جا سکتا۔ پانچ بجے ان کے گھر فون آیا کہ جسٹس لویا کا قتل ہوا، لیکن پوسٹ مارٹم میں موت کا وقت 7.15 بجے درج ہے۔ پوسٹ مارٹم اور وِسرا کی رپورٹوں میں بھی تال میل نہیں ہے۔ اتنا گول مال ہے کہ یہ معاملہ دبائے نہیں دب رہا ہے۔ سچ کو چھپایا نہیں جا سکتا۔ یہ فیصلہ عدالتی نظام پر بدنما داغ ہے۔