روس کے ساتھ سمجھوتہ پر ریفرنڈم کرائیں گے زیلینسکی، عوام کی حمایت ملی تو کسی بھی شرط کے لیے تیار

یوکرین کے صدر ولودمیر زیلینسکی کا کہنا ہے کہ وہ روس کے ساتھ امن مذاکرہ سے متعلق سمجھوتہ معاملے پر یوکرین میں ایک ریفرنڈم کرائیں گے۔ انھوں نے کہا کہ روس کے ساتھ کیف کے سمجھوتے کو یوکرین میں ایک ملک گیر ریفرنڈم کے لیے رکھا جائے گا اور اگر اس میں ملک کے لوگوں کی حمایت ملی تو وہ کسی بھی سمجھوتے کے لیے تیار ہیں۔

سرکاری خبر رساں ایجنسی ’یوکرین فارم‘ کے مطابق زیلینسکی نے یوکرین کے براڈکاسٹر سسپلنے کے ساتھ ایک انٹرویو میں کہا کہ ’’میں نے سبھی مذاکرہ گروپوں کو سمجھایا ہے، جب آپ ان سبھی تبدیلیوں کے بارے میں بات کرتے ہیں، اور وہ تاریخی ہو سکتے ہیں تو ہمیں کہیں نہیں جانا، ہم ایک ریفرنڈم کریں گے۔‘‘ نیوز ایجنسی سنہوا کی رپورٹ کے مطابق یوکرین کے صدر ولودمیر زیلینسکی نے اس بات پر زور دیا کہ اگر یوکرین کے لوگوں کی حمایت ملتی ہے تو وہ کسی بھی سمجھوتے کے لیے تیار ہیں۔ ایک طرح سے زیلینسکی نے صاف کر دیا ہے کہ وہ روس کے ساتھ سمجھوتے کی شرطوں پر بغیر یوکرین کے لوگوں کی حمایت کے وہ آگے نہیں بڑھیں گے۔

واضح رہے کہ یوکرین اور روس کے نمائندہ وفود کے درمیان چوتھے دور کا مذاکرہ 14 مارچ کو ویڈیو لنک کے ذریعہ سے شروع ہوا تھا۔ اس درمیان یوکرین کے صدر کے صلاح کار میخائیلو پوڈولیک نے 18 مارچ کو کہا کہ جنگ بندی، فوجیوں کی واپسی اور خصوصی ذرائع کے ساتھ سخت سیکورٹی گارنٹی روس کے ساتھ امن مذاکرہ میں یوکرین کے اہم مطالبات ہیں۔