عالمی رہنماؤں کی مسلمانوں کو رمضان المبارک کی مبارکباد

واشنگٹن: امریکی صدر جوبائیڈن سمیت دیگر عالمی رہنماؤں نے مسلمانوں کو ماہِ صیام کی مبارکباد پیش کی، جو بائیڈن نے امت مسلمہ کو ماہ رمضان کی مبارک باد دیتے ہوئے کہا کہ رمضان کے بابرکت مہینے کے آغاز پر امریکہ اور دنیا بھر میں موجود مسلمانوں کے لیے نیک تمنائیں، اپنے بیان میں جو بائیڈن نے قرآن مجید کی ایک آیت کا حوالہ بھی دیا اور کہا کہ قرآن پاک ہمیں سکھاتا ہے کہ جو کوئی ذرہ برابر بھی نیکی کرے گا وہ اس کا اجر پائے گا۔ جو بائیڈن وہ واحد امریکی صدر ہیں جنہوں نے اپنے بیان میں قرآن کریم کا حوالہ دیا۔

دوسری جانب اقوام متحدہ کے سیکرٹری جنرل انتونیو گوٹریس نے کہا کہ ’قرآن پاک ہمیں سکھاتا ہے کہ خدا نے قوموں اور قبیلوں کو اس لیے بنایا تاکہ ہم ایک دوسرے کو پہچان سکیں‘۔ انہوں نے مزید کہا کہ اس مقدس مہینے میں اور ہر دن ہم تمام خواتین اور مردوں کی حفاظت، وقار اور خوشحالی کے لیے ہاتھ سے ہاتھ ملا کر کام کریں، ایک دوسرے سے سیکھیں اور مل کر ایک پرامن دنیا بنائیں۔ ملیشیا کے وزیراعظم اسماعیل صابری یعقوب نے بھی مسلمانوں کو رمضان کی مبارکباد پیش کی اور نیک خواہشات کا اظہار کیا۔

اس کے علاوہ کینیڈین وزیراعظم جسٹن ٹروڈو نے بھی مسلمانوں کو رمضان کی مبارکباد دی اور ویڈیو کا آغاز ’سلام‘ سے کیا۔ انہوں نے ویڈیو پیغام میں کہا آج کینیڈا اور دنیا بھر کے مسلمان رمضان کے مقدس مہینے کو منانے کا آغاز کر رہے ہیں، یہ عبادت، نفس کو پرکھنے اور غور و فکر کا وقت ہے اور اسلام کے بنیادی اقدار جیسے امن، ہمدردی اور سخاوت کو منانے کا وقت ہے۔