بل گیٹس اور ملنڈا گیٹس کی علیحدگی سے دنیا حیران

سیاٹل: مائیکرو سافٹ کے شریک بانی بل گیٹس اور ان کی اہلیہ ملنڈا گیٹس نے باہمی رضامندی سے اپنی 27 سالہ شادی کو ختم کرنے کے اعلان سے دنیا کو حیرت میں مبتلا کردیا ہے۔ دونوں نے 4 مئی کو اپنی ٹوئٹس میں تصدیق کی کہ دونوں نے مشترکہ طور پر 27 سالہ شادی ختم کرنے کا فیصلہ کیا ہے۔

بل اور ان کی اہلیہ ملنڈا گیٹس کی جوڑی کا شمار دنیا کی وفادار اور رومانوی ترین جوڑیوں میں ہوتا رہا اور دونوں نے مجموعی طور پر ایک دوسرے کے ساتھ 34 برس گزارے۔ فرانسیسی نسل سے تعلق رکھنے والی ملنڈا گیٹس امریکہ میں ہی پیدا ہوئی ہیں اور انہوں نے 1986 میں بل گیٹس کی سافٹ ویئر کمپنی مائیکرو سافٹ میں پروڈکٹ منیجر کی ملازمت شروع کی تھی اور ملازمت کے ایک سال بعد دونوں میں رومانوی تعلقات استوار ہوگئے تھے اور دونوں نے چند سال تک تعلقات میں رہنے کے بعد 1994 میں شادی کی تھی۔

اس جوڑے نے ٹوئٹر پر اعلان کرتے ہوئے کہا کہ وہ اپنے فاؤنڈیشن کے لئے مل کر کام کرتے رہیں گے لیکن ہم بطور میاں بیوی اپنی زندگیوں کے اگلے مراحل میں ایک ساتھ ترقی نہیں کر سکتے۔‘ انہوں نے ایک بیان میں کہا ’’ہم نے تین ناقابل یقین بچوں کی پرورش کی ہے اور ایک ایسا فاؤنڈیشن بنایا ہے جو پوری دنیا میں کام کرتا ہے تاکہ تمام لوگوں کو صحت مند اور بارآور زندگی گزارنے کے قابل بنایا جاسکے‘‘۔

'ڈان' کی رپورٹ کے مطابق ملازمت سے محبت اور پھر شادی کے بعد ایک ساتھ نئے فلاحی منصوبے اور کاروبار شروع کرنے سے کامیاب والدین بننے کے بعد ان کی جوڑی کو دنیا کی وفادار اور رومانوی ترین جوڑی مانا جاتا تھا۔ دنیا کے امیر ترین فرد کا اعزاز رکھنے کے باوجود بل گیٹس کو سادہ زندگی گزارنے اور گھریلو کام کرتے ہوئے دیکھنے پر بھی ان کی تعریفیں کی جاتی رہی ہیں۔

بل اور ملنڈا گیٹس کے تین بچے ہیں، جن میں سے سب سے بڑی بیٹی جینیفر کیتھرائن گیٹس کی عمر 25 سال ہے جب کہ ان کے دو بیٹے بھی ہیں اور ان کی عمریں بھی 20 سال سے زائد ہیں۔ تین دہائیوں سے زیادہ عرصے تک جوڑے کی صورت میں تعلقات میں رہنے اور 27 سال تک ازدواجی زندگی گزارنے کے دوران کبھی بھی بل اور ملنڈا گیٹس کے درمیان کشیدہ تعلقات کی خبریں سامنے نہیں آئی تھیں اور اب اچانک دونوں نے شادی ختم کرنے کا اعلان کرکے دنیا کو حیران کر دیا۔

دونوں نے اپنے ٹوئٹس میں بتایا کہ کئی سال تک ایک ساتھ زندگی گزارنے کے بعد اب انہیں احساس ہونے لگا ہے کہ اب وہ شادی شدہ جوڑے کی صورت میں مزید آگے نہیں چل سکتے اور نہ ہی ترقی کرسکتے ہیں۔ دونوں نے ٹوئٹس میں تصدیق کی کہ اگرچہ انہوں نے شادی ختم کرنے کا فیصلہ کیا ہے تاہم وہ مشترکہ طور پر اپنے تمام کاروباری اور فلاحی منصوبے چلائیں گے۔

دونوں کی جانب سے اگرچہ شادی ختم کرنے کا اعلان کیا گیا ہے تاہم طلاق کے حوالے سے مزید معلومات سامنے نہیں آ سکیں اور یہ واضح نہیں ہے کہ طلاق کے عوض ملنڈا گیٹس کو کتنی دولت ملے گی؟ فوربز کی 2021 کی ارب پتی افراد کی فہرست کے مطابق بل گیٹس کے پاس 130 ارب ڈالر کی دولت ہے اور وہ دنیا کے چوتھے امیر ترین شخص ہیں۔

بل گیٹس کی دولت کے علاوہ فلاحی تنظیم بل اینڈ ملنڈا گیٹس فاونڈیشن کی مالیت بھی اربوں ڈالرز کی ہے اور وہ اس وقت دنیا کی بڑی فلاحی تنظیموں میں سے ایک ہے جو زیادہ تر بچوں اور خواتین کی ویکسینیشن، غذائیت، ماحول اور غربت کے خاتمے پر کام کرتی ہے۔

دونوں نے طلاق کا اعلان ایک ایسے وقت میں کیا ہے جب کہ گزشتہ برس ہی ملنڈا گیٹس نے اربوں ڈالرز کی سرمایہ کاری سے نئی فلاحی تنظیم کے قیام کا اعلان کیا تھا، جو صنفی مساوات پر کام کرے گی۔ خیال کیا جا رہا ہے کہ دونوں کے درمیان مشترکہ طور پر بل اینڈ ملنڈا گیٹس کو چلانے کا معاہدہ ہوگا اور اس کے علاوہ بھی ملنڈا گیٹس کو طلاق کے عوض شوہر کی نصف تک دولت ملے گی تاہم اس حوالے سے کچھ بھی کہنا قبل از وقت ہے۔