کمبوڈیا کے بادشاہ نے ہن مانیٹ کو نیا وزیراعظم مقرر کیا

نوم پنہ: کمبوڈیا کے بادشاہ نوروڈوم سیہامونی نے پیر کو موجودہ وزیر اعظم سمڈیک ٹیکو ہن سین کے استعفیٰ کے اعلان کے بعد ہن مانیٹ کو نیا وزیر اعظم مقرر کیا ہے۔ ہن سین کی درخواست کے بعد، بادشاہ نے ایک شاہی فرمان پر دستخط کیے جس میں 45 سالہ ہن مانیٹ کو پانچ سالہ حکومت کے لیے نیا وزیر اعظم نامزد کیا گیا۔

سیہامونی نے شاہی فرمان میں کہا ’’کمبوڈیا کی سلطنت کے نامزد وزیر اعظم کا فرض ہے کہ وہ حکومتی اراکین کو قومی اسمبلی کا اعتماد حاصل کرنے کے لیے تیار کریں‘‘۔ انہوں نے کہا کہ "یہ شاہی فرمان اس دن سے نافذ العمل ہے جس دن اس پر دستخط ہوئے ہیں۔"

ہن مانیٹ کو اپنی نئی کابینہ کے ارکان کے ساتھ باضابطہ طور پر نیا وزیراعظم بننے کے لیے 22 اگست کو قومی اسمبلی میں اعتماد کا ووٹ حاصل کرنا ہوگا اور اسی دن ان کی حلف برداری متوقع ہے۔ یہ تقرری ہن سین کی حکمراں کمبوڈیا کی پیپلز پارٹی (سی پی پی) نے 23 جولائی کے عام انتخابات میں قومی اسمبلی کی 125 میں سے 120 نشستوں پر بھاری اکثریت حاصل کرنے کے بعد کی ہے۔

ہن مانیٹ اس وقت سی پی پی کی اسٹینڈنگ کمیٹی کے رکن اور رائل کمبوڈین آرمڈ فورسز کے ڈپٹی کمانڈر انچیف ہیں۔ ہن سین نے 26 جولائی کو اعلان کیا کہ وہ 38 سال سے زیادہ وزیر اعظم رہنے کے بعد اقتدار کی باگ ڈور اپنے بڑے بیٹے ہن مانیٹ کو سونپیں گے۔ تاہم، 71 سالہ رہنما نے کہا کہ وہ سی پی پی کے صدر رہیں گے اور اگلے سال 25 فروری کو ہونے والے سینیٹ انتخابات میں سینیٹ کے صدر کا عہدہ سنبھالیں گے۔