کورونا کے ’جے این 1‘ ویریئنٹ کو ڈبلیو ایچ او نے کیا کلاسیفائیڈ

عالمی ادارۂ صحت (ڈبلیو ایچ او) نے کووڈ-19 کے نئے ذیلی ویریئنٹ جے این 1 کو ’ویریئنٹ آف انٹریسٹ‘ کی شکل میں کلاسیفائیڈ کر دیا ہے۔ حالانکہ ڈبلیو ایچ او کا کہنا ہے کہ اس سلسلے میں زیادہ فکر مند ہونے کی ضرورت نہیں ہے۔ ڈبلیو ایچ او نے اس سے عوامی صحت کو زیادہ خطرہ نہ ہونے کی بات کہی ہے۔ ڈبلیو ایچ او نے اپنے بیان میں کہا ہے کہ ’’ موجودہ ثبوتوں کی بنیاد پر جے این 1 سے پیدا اضافی عالمی عوامی صحت جوکھم کو حال میں کم مانا گیا ہے۔‘‘

واضح رہے کہ 8 دسمبر کو ہندوستان میں بھی جے این 1 ذیلی ویریئنٹ کا پہلا معاملہ سامنے آیا تھا۔ کیرالہ میں ایک 79 سالہ خاتون اس سے متاثر ہوئی تھی۔ اس معاملہ کے سامنے آنے پر کیرالہ سمیت پڑوسی ریاست الرٹ ہو گئے تھے۔ علاوہ ازیں 18 دسمبر کو مرکزی حکومت نے کورونا کے حالات پر نگرانی رکھنے اور الرٹ رہنے سے متعلق مشورہ ریاستوں کے لیے جاری کیا تھا۔ مرکزی حکومت نے ریاستوں کو صلاح دی ہے کہ وہ آر ٹی-پی سی آر سمیت ضروری ٹیسٹ یقینی بنائیں اور پازیٹو نمونے جینوم سیکوئنسنگ کے لیے ’آئی این ایس اے سی او جی‘ تجربہ گاہوں میں بھیجے جائیں۔