آئی ایم ایف چیف نے ہندوستان کو بتایا عالمی معیشت کا ’چمکتا سورج‘، 2023 میں عالمی ترقی میں رہے گا 15 فیصد کا تعاون!

دنیا کے کئی بڑے ممالک اس وقت معاشی بحران کی زد میں ہیں۔ امریکہ، برطانیہ اور یوروپی یونین اس بحران کے وقت میں کافی پریشانی کا سامنا کر رہے ہیں۔ ایسے وقت میں ایشیا کی معیشت تیز رفتاری کے ساتھ ترقی کرتی ہوئی دکھائی دے رہی ہے۔ آنے والے دنوں میں خصوصاً ہندوستان سے کافی امیدیں لگائی جا رہی ہیں۔ بین الاقوامی مانیٹری فنڈ (آئی ایم ایف) کی منیجنگ ڈائریکٹر کرسٹالینا جارجیوا نے تو یہاں تک کہا ہے کہ 2023 کے دوران دنیا کی معاشی ترقی میں تنہا ہندوستان کا تعاون 15 فیصد رہے گا۔

قابل ذکر ہے کہ آئی ایم ایف نے حال ہی میں ’ورلڈ اکونومک آؤٹ لک رپورٹ- اے راکی ریکوری‘ شائع کی تھی۔ اس میں 2023 کے دوران ہندوستان کی معاشی شرح ترقی 5.9 فیصد رہنے کا اندازہ ظاہر کیا گیا ہے۔ حالانکہ یہ آئی ایم ایف کے ذریعہ قبل میں کی گئی پیشین گوئی 6.1 فیصد سے کچھ کم ضرور ہے، لیکن موجودہ عالمی معاشی بحران کے دورن میں کافی بہتر ہے۔

آئی ایم ایف کا کہنا ہے کہ 2023 میں ایشیا اور بحرالکاہل علاقہ کے ممالک 4.6 فیصد کی شرح سے ترقی کریں گے۔ 2022 میں یہ شرح ترقی محض 3.8 فیصد تھی۔ اتنا ہی نہیں، دنیا کی معاشی ترقی میں یہ پورا علاقہ 70 فیصد کا تعاون دے گا۔ ان میں بھی ہندوستان اور چین جیسے ملک عالمی ترقی میں نصف سے زیادہ کی شراکت داری کریں گے۔ آئی ایم ایف چیف کرسٹالینا نے تو خاص طور سے ہندوستان کی معاشی ترقی کی تعریف کی ہے۔ کرسٹالینا کے مطابق ہندوستان آنے والے دنوں میں عالمی معیشت کا ’چمکتا سورج‘ بنا رہے گا۔ عالمی ترقی میں تنہا ہندوستان 15 فیصد سے زیادہ کا حصہ دار ہوگا۔