سنیتا ولیمس کو بڑی ذمہ داری، انٹرنیشنل اسپیس اسٹیشن کی ملی کمان

جہاں ایک طرف 5 جون 2024 سے ہی اسپیس اسٹیشن پر پھنسی خلاباز سنیتا ولیمس کو زمین پر لانے کی مسلسل کوششیں کی جا رہی ہیں وہیں دوسری جانب خلا میں انہیں ایک نئی ذمہ داری بھی سونپ دی گئی ہے۔ اطلاع ہے کہ سنیتا ولیمس کو آئی ایس ایس یعنی بین الاقوامی اسپیس اسٹیشن کی کمان مل گئی ہے۔

میڈیا رپورٹس کے مطابق امریکی اسپیس ایجنسی 'ناسا' نے اعلان کیا ہے کہ روسی کاسمونوٹ اولیک کونونینکو نے اسپیس اسٹیشن کی کمان سنیتا ولیمس کو سونپ دی ہے۔ اس سلسلے میں اسپیس اسٹیشن پر ایک چھوٹی تقریب بھی منعقد ہوئی تھی۔ خلا میں 374 دن گزارنے کے بعد واپس روس کے کونونینکو اور نکولائی چُب اور ایک امریکی خلاباز ٹریسی ڈائسن زمین پر واپس آ گئے ہیں۔ ڈائسن نے خلا میں 6 مہینہ کا وقت گزارا ہے۔

دو روسی اور ایک امریکی شہری کو لے کر سویوز کیپسول پیر کو قزاقستان میں اُترا۔ اس کے ساتھہ ہی روس کے دونوں خلائی مسافر کا طویل قیام ختم ہو گیا۔ آئی ایس ایس سے الگ ہونے کے تقریباً ساڑھے تین گھنٹے کے بعد کیپسول قزاقستان کے میدان پر پہنچا۔ زمین پر واپسی کے آخری مرحلے میں لال اور سفید پیراشوٹ کے کھلنے کے ساتھ یہ کیپسول تقریباً 7.2 میٹر فی سکنڈ کی رفتار سے اترا۔

قابل ذکر ہو کہ تقریباً 12 سال پہلے یعنی 2012 میں بھی ایکسپیڈیشن 33 کے دوران سنیتا ولیمس نے اسپیس اسٹیشن کی قیادت کی تھی۔ اسپیس اسٹیشن کی کپتان ہونے کے ناطے ہندوستانی نسل کی یہ خلاباز کئی اہم آپریشن اور سائنٹفک ریسرچ پر کام سنبھالیں گی۔ پروگرام کے دوران سنیتا ولیمس نے اس نئی ذمہ داری کے ملنے پر کہا "ایکسپیڈیشن 71 نے ہمیں کافی کچھ سکھایا ہے….آپ نے مجھے اور بُچ کو اپنایا۔ جبکہ یہ پلان کا حصہ بھی نہیں تھا۔ آپ نے ایک کنبہ کی طرح ہمارا استقبال کیا ہے۔"