سری لنکا میں ایک اور بم دھماکہ، کوئی زخمی نہیں

کولمبو: سری لنکا کی راجدھانی کولمبو اور اس کے اردگرد کے شہروں میں اتوار کو ایسٹر کے موقع پر ہوئے سلسلہ وار بم دھماکوں کے بعد جمعرات کو مشرقی شہر پگوڈا میں دھماکہ ہوا، حالانکہ اس میں کسی طرح کے جانی ومالی نقصان کی کوئی اطلاع نہیں ہے۔

اتوار کو دھماکوں کے بعد ملک ہائی الرٹ پر ہے۔ سول ایوی ایشن اتھارٹی نے سری لنکا کے ہوائی علاقے میں ڈرون کی پرواز کو فوری طور سے معطل کرنے کا فیصلہ کیا ہے۔

پولس کے ترجمان روون گناسیکارا نے بتایا کہ کولمبو سے 40 کلومیٹر دور پگوڈا شہر میں مجسٹریٹ عدالت کے پیچھے خالی زمین پر ہوئے دھماکے کی جانچ کی جارہی ہے۔ انہوں نے کہا کہ ’’عدالت کے احاطے کے پیچھے ایک دھماکہ ہوا ہے، ہم اس کی جانچ کررہے ہیں۔ اتوار کو ہوئے دہشت گردانہ حملے میں 359 لوگوں کی موت ہوگئی تھی اور تقریبا 500 لوگ زخمی ہوگئے تھے۔

اس درمیان کولمبو پیج کی رپورٹ کے مطابق ایک ریلیز جاری کی گئی ہے جس میں کہا گیا ہے شہری ایوی ایشن اتھارٹی کے ڈائرکٹر جنرل ایچ ایم سی نمال سیری نے اعلان کیا ہے کہ سری لنکا کے ہوائی علاقے میں ڈرون سمیت پائلٹ کے بغیر جہازوں کی پروازیں جمعرات سے اگلی اطلاع تک معطل رہیں گی۔

ریلیز میں کہا گیا ہے کہ ’’اگلی اطلاع آنے تک سری لنکا کے ہوائی علاقے میں اس طرح کے پائلٹ کے بغیر جہازوں کی پرواز میں کوئی شخص شامل نہیں ہوگا۔‘‘

دہشت گرد تنظیم اسلامک اسٹیٹ نے سری لنکا میں ہوئے سلسلہ وار حملے کی ذمہ داری قبول کرنے کے ساتھ ساتھ حملے کو انجام دینے والے سات خود کش حملہ آوروں کی تصویریں بھی جاری کی ہیں۔ سری لنکا میں ایک عشرہ پہلے ختم ہوئی خانہ جنگی کے بعد یہ حملہ اس ملک کے لے سب سے بڑی ٹریجڈی ہے۔

حکومت نے یہ بھی دعوی کیا ہے کہ یہ دہشت گردانہ حملہ گزشتہ مہینے نیوزی لینڈ میں مسجدوں میں ہوئے حملے کا انتقام لینے کے لئے کیا گیا تھا۔ حکومت نے یہ بھی قبول کیا ہے کہ حملے کو انجام دینے والے ساتوں خودکش حملہ آور سری لنکاکے ہی شہری تھی۔