قطر، مصر اور امریکہ کی مشترکہ طور پر حماس اور اسرائیل سے جنگ ختم کرنے کی اپیل

قطر، مصر اور امریکہ نے مشترکہ طور پر جاری اپنے ایک بیان میں حماس اور اسرائیل سے مطالبہ کیا کہ وہ امریکی تجویز پر معاہدے کو حتمی شکل دیں۔ یہ مشترکہ بیان قطر کی وزارت خارجہ نے جاری کیا ہے۔ اس بیان میں یہ بھی کہا گیا ہے کہ اسرائیل اور حماس کو غزہ میں جنگ بندی اور یرغمالیوں کی رہائی کے لیے آپس میں بات چیت کرنی چاہیے۔

خبر رسا ایجنسی سنہوا کے مطابق یہ بیان ہفتہ (یکم جون) کو جاری کیا گیا ہے جس میں فریقین کے مطالبات کو ایک معاہدے کے تحت عمل میں لایا گیا ہے جو دونوں کے مفادات کو پورا کرتا ہے اور غزہ میں مصیبت زدہ افراد کے ساتھ ساتھ یرغمالیوں اور ان کے اہل خانہ دونوں کو فوری امداد فراہم کرے گا۔ اسی کے ساتھ اس معاہدے میں مستقل جنگ بندی اور بحران کے خاتمے کے لیے ایک روڈ میپ بھی شامل ہے۔ امریکی صدر جو بائیڈن نے جمعہ کو اس تجویز کا انکشاف کیا، جس کے تحت غزہ کا تنازع ختم کر کے تمام یرغمالیوں کو رہا کر دیا جائے گا۔

دریں اثنا مغربی کنارے میں فلسطینی ذرائع نے بتایا کہ جیریکو کے جنوب میں عقابت جابر مہاجر کیمپ میں اسرائیلی فورسز کی فائرنگ میں ایک فلسطینی لڑکے کی موت ہوگئی ہے۔ فلسطینی سیکورٹی ذرائع نے سنیچر کو خبر رساں ایجنسی سنہوا کو بتایا کہ اسرائیلی فورسز نے کیمپ پر دھاوا بول دیا اور کیمپ کے مغربی قبرستان کے قریب دو افراد کو گولی مار دی۔ فلسطینی ہلال احمر سوسائٹی نے ہفتے کے روز ایک مختصر بیان میں کہا کہ اسے ایک 15 سالہ لڑکے کی لاش جنوبی چیک پوائنٹ پر ملی جبکہ ایک شخص زخمی ہے۔

اسرائیلی فوج نے اس واقعے پر کوئی تبصرہ نہیں کیا ہے لیکن اسرائیلی فوج نے اکثر کہا ہے کہ مغربی کنارے میں اس کے چھاپے ’انسداد دہشت گردی کی کارروائیاں‘ ہیں۔ فلسطینی وزارت صحت کے مطابق گزشتہ اکتوبر سے مغربی کنارے اور یروشلم میں 500 سے زائد فلسطینی ہلاک ہو چکے ہیں۔

دوسری جانب اسرائیلی وزیر اعظم بنجامن نیتن یاہو نے کہا ہے کہ انہوں نے واشنگٹن میں امریکی کانگریس کے مشترکہ اجلاس سے خطاب کی دعوت قبول کر لی ہے۔ اسرائیلی وزیر اعظم نے ہفتے کے روز ایک بیان میں کہا کہ وہ کانگریس کے دونوں ایوانوں میں اسرائیل فلسطین تنازع پر سچائی بتائیں گے۔ خبر رساں ایجنسی سنہوا کی رپورٹ کے مطابق امریکی سینیٹ اور ایوان نمائندگان نے نیتن یاہو کو امریکی کانگریس میں تقریر کرنے کی دعوت دی ہے۔