بنگلہ دیش میں مظاہرین نے توڑا شیخ مجیب الرحمان کا مجسمہ، سر پر برسائے ہتھوڑے!

ڈھاکہ: ریزرویشن کے معاملے پر بنگلہ دیش میں شروع ہونے والا احتجاج اب قابو سے باہر ہو گیا ہے۔ ملک کے حالات ابتر ہو چکے ہیں۔ شیخ حسینہ نے وزیراعظم کے عہدے سے استعفیٰ دے دیا ہے۔ وہ ملک سے ہندوستان سے لئے روانہ ہو چکی ہیں۔ اس دوران مظاہرے کی ایک تصویر سامنے آئی، جس میں پرتشدد مظاہرین نے بنگلہ دیش کے بانی شیخ مجیب الرحمان کے مجسمہ کو ہتھوڑے سے توڑ دیا۔

بنگلہ دیش کی سیاست میں شیخ مجیب الرحمن کا قد ہندوستان میں مہاتما گاندھی جیسا ہے اور بنگلہ دیش کے لوگوں میں مجیب الرحمان کو بنگ بندھو کے نام سے جانا جاتا ہے۔ مظاہرین اس قدر مشتعل ہو گئے کہ وہ بنگلہ دیش کے بابائے قوم کہلانے والے بنگ بندھو شیخ مجیب الرحمان کے مجسمہ پر چڑھ گئے اور ہتھوڑوں سے وار کرنے لگے۔

بنگلہ دیش میں شیخ حسینہ کے استعفیٰ کے بعد مظاہرین ڈھاکہ میں وزیر اعظم کی رہائش گاہ میں داخل ہو گئے ہیں۔ تصاویر میں مظاہرین وزیر اعظم کی رہائش گاہ کا سامان اٹھاتے ہوئے نظر آ رہے ہیں۔ تاہم، کچھ دیر قبل شیخ حسینہ اپنا استعفیٰ دے کر بھارت کے شہر اگرتلہ روانہ ہو گئیں۔ اس کے بعد بنگلہ دیش کے آرمی چیف جنرل وقار الزمان نے قوم سے خطاب کرتے ہوئے عوام سے امن برقرار رکھنے کی اپیل کی۔

بنگلہ دیش میں ریزرویشن کے معاملے پر کئی بار تشدد بھڑک اٹھا ہے۔ مظاہرین نے مطالبہ کیا کہ 1971 کے آزادی پسندوں کے خاندانوں کے لیے 30 فیصد سرکاری ملازمتوں کے لیے مختص کوٹہ سسٹم کو ختم کیا جائے۔ اس سے قبل جب تشدد ہوا تو عدالت نے کوٹہ کی حد کم کر دی تھی۔ لیکن تشدد نہیں رکا اور اب مظاہرین سڑکوں پر نکل آئے ہیں اور تشدد کر رہے ہیں۔ اس مظاہرے میں اب تک 300 سے زائد افراد ہلاک ہو چکے ہیں۔