وزیر اعظم نے امریکی نائب صدر کملا ہیرس کو ہندوستان آنے کی دعوت دی

وزیر اعظم نریندر مودی نے اپنے تین روزہ دورے کے دوران امریکی نائب صدر کملا ہیرس سے ملاقات کی ۔ یہ امریکہ کی تاریخ میں پہلی مرتبہ ہوا ہے کہ امریکہ میں ہند وستان سے تعلق رکھنے والے امریکی نائب صدر نے ہندوستان کے وزیر اعظم کا استقبال کیا ہو۔

امریکی نائب صدر کملا ہیرس نے کہا کہ ان کو وزیر اعظم کا استقبال کرتے ہوئے خوشی محسوس ہو رہی ہے۔ وزیر اعظم نریندر مودی نے بھی امریکی نائب صدر کملا ہیرس کی کافی تعریف کی ۔ وزیر اعظم نے کہا کہ کملا ہیرس پوری دنیا کے لئے ایک مثال ہیں ۔وزیر اعظم نے کملا ہیرس کو ہندوستان آنے کے لئے مدعو کیا ۔ وزیر اعظم نے کہا کہ اگر کملا ہیرس ہندوستان آتی ہیں تو پورے ہندوستان کو بہت خوشی ہوگی۔

ملاقات کے دوران وزیر اعظم نریندر مودی نے اس یقین کا اظہار کیا کہ امریکی صدر جو بائیڈن اور نائب صدر کملا ہیرس کی قیادت میں ہندوستان اور امریکہ کے تعلقات نئی اونچائیوں پر پہنچیں گے۔ میٹنگ کے دوران دونوں رہنماؤں نے اسٹریٹیجک شراکت کو مضبوط کرنے پر زور دیا ۔اس سے قبل کملا ہیرس نے کورونا وبا کے بحران کے دور میں نے ہندوستانی وزیر اعظم سے بات کی تھی۔