’سری لنکا کو ہندوستان کے خلاف استعمال نہیں ہونے دیں گے‘، سری لنکائی صدر وکرماسنگھے کا وعدہ

سری لنکا کے صدر رانل وکرماسنگھے نے ایک بار پھر اس بات کو دہرایا ہے کہ چین کے ساتھ ان کا کوئی فوجی معاہدہ نہیں ہے اور وہ اس جزیرہ نما ملک کو ہندوستان کے خلاف کسی بھی خطرے کے لیے بنیاد کی شکل میں استعمال کرنے کی اجازت نہیں دیں گے۔

صدر وکرماسنگھے نے فرانسیسی میڈیا کے ساتھ ایک انٹرویو میں کہا کہ ’’ہم ایک غیر جانبدار ملک ہیں، لیکن ہم اس بات پر بھی زور دیتے ہیں کہ ہم سری لنکا کو ہندوستان کے خلاف کسی بھی خطرے کے لیے بنیاد کی شکل میں استعمال کرنے کی اجازت نہیں دے سکتے۔‘‘

جب وکرماسنگھے سے سری لنکا میں چین کی موجودگی، خصوصاً فوجی موجودگی کے بارے میں پوچھا گیا تو انھوں نے جواب دیا کہ ’’چین کے ساتھ ہمارا کوئی فوجی معاہدہ نہیں ہے، کوئی فوجی معاہدہ آگے بھی نہیں ہوگا، اور مجھے نہیں لگتا کہ چین اس طرح کے کسی معاہدہ میں شامل ہوگا۔‘‘

سری لنکائی صدر نے کہا کہ چینی وہاں تقریباً 1500 سال سے ہیں اور اب تک وہاں کوئی فوجی اڈہ نہیں ہے۔ انھوں نے ہمبن ٹوٹا بندرگاہ کے بارے میں اعتراف کیا کہ اسے چین کے کاروباریوں کو دے دیا گیا ہے، لیکن اس کی سیکورٹی سری لنکا حکومت کے ہاتھوں میں ہے۔ انھوں نے یقین دلایا کہ ’’جنوبی بحریہ کمان کو ہمبن ٹوٹا میں منتقل کیا جائے گا۔‘‘ چین کے ذریعہ بندرگاہ کے فوجی استعمال کا یقینی طور پر کوئی ایشو نہیں ہے۔ یہی کمپنی کولمبو بندرگاہ، ساؤتھ پورٹ میں ایک ٹرمینل بھی چلاتی ہے۔ یہیں پر سبھی ممالک سے سبھی آبدوز آتے ہیں۔ وہ مزید کہتے ہیں کہ ’’کوئی بھی کولمبو میں ٹرمینل کے بارے میں شکایت نہیں کر رہا ہے، لیکن وہ صرف ہمبن ٹوٹا بندرگاہ کے بارے میں شکایت کر رہے ہیں۔‘‘