امارات-اسرائیل معاہدے کو فلسطینی قیادت نے کیا مسترد، اقوام متحدہ کا خیرمقدم

فلسطینی قیادت نے متحدہ عرب امارات اور اسرائیل کے درمیان تعلقات استوار کرنے کے معاہدے کو مسترد کر دیا ہے۔ فلسطینی قیادت نے اس حوالے سے عرب لیگ اور اسلامی تعاون تنظیم (او آئی سی) کا ہنگامی اجلاس منعقد کرنے کا مطالبہ بھی کیا ہے۔

اس سے قبل فلسطینی صدر محمود عباس نے جمعرات کے روز اپنے مشیران کے ایک 'فوری اجلاس' طلب کیا تھا تا کہ اس معاہدے کے حوالے سے بیان جاری کرنے سے قبل اس سمجھوتے کو زیر بحث لایا جا سکے۔ فلسطینی سرکاری خبر رساں ایجنسی "وفا" کے مطابق محمود عباس نے نے ایک فوری اجلاس طلب کیا ہے۔ اجلاس کے بعد امریکا، امارات اور اسرائیل کی جانب سے جمعرات کے روز سامنے آنے والے مشترکہ اعلان کے حوالے سے بیان جاری کیا جائے گا۔

دوسری جانب اسرائیلی وزیر اعظم بنیامین نیتن یاہو نے جمعرات کے روز اپنے اکاؤنٹ پر کی جانے والی ٹویٹ میں لکھا کہ یہ ایک "تاریخی دن" ہے۔ یہ امارات اور اسرائیل کے درمیان معمول کے تعلقات استوار کرنے کے حوالے سے معاہدے تک پہنچنے کے بارے میں اعلان پر پہلا اسرائیلی رد عمل تھا۔ اس معاہدے کے متن کے مطابق دونوں ملکوں کے درمیان دو طرفہ تعلقات قائم ہوں گے اور اس کے مقابل اسرائیل مقبوضہ مغربی کنارے کا ایک وسیع حصہ ضم کرنے کے منصوبے پر عمل درامد روک دے گا۔

بعد ازاں ایک پریس کانفرنس میں نیتن یاہو نے کہا کہ امارات کے ساتھ معاہدہ خطے کے مستقبل کے لیے اہم ہے۔ اسرائیلی وزیر اعظم کے مطابق امارات نے صحراء کو ایک ترقی یافتہ ریاست میں تبدیل کر دیا ،،، امارات کے ساتھ معاہدہ خطے کی ترقی میں مدد گار ثابت ہو گا۔

ادھر، اقوام متحدہ نے متحدہ عرب امارات اور اسرائیل کے درمیان امریکا کی کوششوں سے طے پانے والے امن معاہدے کا خیر مقدم کیا ہے۔ اقوام متحدہ کے سیکرٹری جنرل انٹونیو گٹیرس کے ترجمان نے ایک بیان میں کہا کہ مشرق وسطی کے خطے میں امن و سلامتی کو فروغ دینے والے کسی بھی اقدام کا خیرمقدم کرتے ہیں۔