چین سے آئی خوشخبری، 24 گھنٹے میں کورونا انفیکشن سے کوئی موت نہیں

پوری دنیا میں کورونا وائرس کی دہشت پھیلی ہوئی ہے اور چین سے پھیلے اس وائرس کی وجہ سے اموات میں لگاتار اضافہ ہوتا جا رہا ہے۔ اس درمیان چین سے ایک اچھی خبر یہ آئی ہے کہ گزشتہ 24 گھنٹوں میں وہاں کورونا کی وجہ سے ایک بھی موت نہیں ہوئی۔ یہاں قابل غور ہے کہ چین نے کورونا وائرس پر کافی حد تک قابو پا لیا ہے اور وہاں گزشتہ کچھ دنوں سے اموات کی تعداد لگاتار کم ہو رہی ہے اور پیر کے روز تو ایک بھی موت نہیں ہوئی۔ دوسری طرف اٹلی، امریکہ، فرانس، ایران وغیرہ سے لگاتار موت کی خبریں آ رہی ہیں۔

قابل ذکر ہے کہ جنوری سے ایسا پہلی بار ہوا ہے جب چین میں پورے دن کورونا وائرس انفیکشن سے کسی کی بھی موت نہیں ہوئی۔ وزارت صحت نے اس بات کی بھی تصدیق کی کہ چین میں رہ رہے کسی شخص کے متاثر ہونے کا بھی تازہ معاملہ سامنے نہیں آیا ہے۔ وزارت صحت نے بتایا کہ پیر کو کورونا سے متاثر 32 نئے کیسز سامنے آئے تھے جس میں تمام بیرونی تھے۔ ابھی تک چین میں کل 983 بیرونی کیسز کی شناخت ہوئی ہے جس میں 698 بیمار ہیں اور 21 کی حالت نازک ہے جبکہ 285 لوگ اس وبا سے ٹھیک ہوئے ہیں۔

وزارت صحت کا کہنا ہے کہ " اسٹیٹ ہیلتھ کمیٹی نے 31 صوبوں (علاقے، مرکز کے زیر کنٹرول شہر) سے کل 81740 کیسز کی تصدیق کی گئی ہے جس میں 1242 افراد بیمار ہیں (212 سنگین حالت میں ہیں)، 77167 لوگوں کو اسپتال سے چھٹی مل گئی ہے اور 3333 لوگوں کی موت ہوئی ہے‘‘۔

(یو این آئی ان پٹ کے ساتھ)