میانمار: روہنگیا پناہ گزینوں کو لے جانے والی کشتی غرقاب، 17 افراد جان بحق

یانگون: میانمار کی رخائن ریاست سے روہنگیا پناہ گزینوں کو لے جانے والی ایک کشتی سمندر میں ڈوب گئی، جس میں تقریباً 17 تارکین وطن کی موت ہو گئی ہے اور متعدد لاپتہ ہیں۔ ریسکیو ٹیم نے جمعہ کو یہ اطلاع دی۔

سیٹوے شہر میں شو یانگ میٹا فاؤنڈیشن کے ساتھ ایک امدادی کارکن بیار لا نے بتایا کہ اس ہفتے اتوار کی رات ایک کشتی سمندر میں ڈوب گئی، جس پر 50 سے زائد افراد سوار تھے۔ انہوں نے کہا کہ ہمیں کل تک 17 لاشیں مل چکی ہیں۔

امدادی کارکن بیار لا نے کہا، ’’ہم نے آٹھ افراد کو زندہ پایا۔ پولیس انہیں پوچھ گچھ کے لیے لے گئی۔" انہوں نے کہا کہ ریسکیورز ابھی تک لاپتہ افراد کو تلاش کرنے کی کوشش کر رہے ہیں، حالانکہ جہاز پرکتنے لوگ سوار تھے اس کی صحیح تعداد معلوم نہیں ہو سکی ہے۔ بنگلہ دیش کی سرحد پر واقع مونگ ڈاؤ ٹاؤن شپ میں ایک روہنگیا امدادی کارکن نے بتایا کہ خراب موسم کی وجہ سے کشتی الٹ گئی۔ حادثے کے بعد تقریباً 500 دیگر افراد ابھی بھی ملیشیا جانے کی امید کر رہے ہیں۔

بدھ مت کی اکثریت والے میانمار کا رخائن تقریباً چھ لاکھ روہنگیا مسلمانوں کا گھر ہے، جو بنگلہ دیش سے نقل مکانی کرنے والے تصور کئے جاتے ہیں اور انہیں شہریت اور تحریک کی آزادی سے محروم کردیا گیا۔ ملیشیا اور انڈونیشیا پہنچنے کی کوشش میں ہر سال ہزاروں روہنگیا بنگلہ دیش اور میانمار کے کیمپوں سے اپنی جانیں خطرے میں ڈال کر سمندری سفر کرتے ہیں۔

اقوام متحدہ کی پناہ گزین ایجنسی کے جنوری کے اعداد و شمار کے مطابق، 2022 میں 39 بحری جہازوں میں 3500 سے زیادہ روہنگیا بحیرہ انڈمان اور خلیج بنگال کو عبور کرنے کی کوشش کی، جو پچھلے سال 700 سے زیادہ تھے۔ ایجنسی نے کہا کہ گزشتہ سال تقریباً 348 روہنگیا سمندر میں مارے گئے یا لاپتہ ہو گئے۔