اُف یہ گرمی! کینیڈا اور امریکہ میں اب تک 700 سے زائد افراد ہلاک

اوٹاوا: امریکہ اور کینیڈا میں گرمی قہر پا رہی ہے اور کینیڈا میں 25 جون تا یکم جولائی کے درمیانی عرصے میں شدید گرمی اور لو لگنے سے 719 افراد اپنی جانوں سے ہاتھ دھو بیٹھے ہیں۔ برٹش کولمبیا کے فورینسک میڈیسن انسٹی ٹیوٹ کی چیئر مین لیزا لاپوئنٹ نے ایک تحریری بیان میں بتایا ہے کہ ریاست بھر میں 25 جون تا یکم جولائی کے درمیانی عرصے میں شدید گرمی اور لو لگنے سے 719 افراد اپنی جانوں سے ہاتھ دھو بیٹھے ہیں۔

اس ریاست میں بلند درجہ حرارت اور بجلی گرنے سے جنگلات میں آگ لگنے کے واقعات میں بھی اضافہ ہوا ہے، جس سے ایک گاؤں کے تمام تر مکانات جل کر خاکستر ہو گئے۔ دریں اثنا گرمی کی لہر متحدہ امریکہ میں بھی اموات کا موجب بن رہی ہے۔ واشنگٹن ڈی سی اور اوریگون میں شدید گرمی کی لہر سے 25 جون سے اب تک 79 افراد موت کے منہ میں جا چکے ہیں۔