اسرائیل نے امریکہ کو دکھائیں آنکھیں! لبنان میں مزید حملوں کا عزم

اسرائیل نے جمعرات کو حزب اللہ کے خلاف عالمی سطح پر جنگ بندی کے مطالبات کو مسترد کر دیا اور حملے جاری رکھنے کا اعلان کیا۔ اسرائیل نے یہ انکار امریکہ کو بھی آنکھیں دکھاتے ہوئے کیا ہے، جس نے 21 روزہ جنگ بندی کی حمایت کی تھی۔ امریکی وزیرِ خارجہ انٹونی بلنکن نے اسرائیل کو متنبہ کیا ہے کہ لبنان کے ساتھ بڑھتے ہوئے تنازعے سے شہریوں کے لیے گھروں کو واپسی مشکل ہو جائے گی۔

رپورٹ کے مطابق، اسرائیلی وزیرِ اعظم بنجمن نیتن یاہو نے واشنگٹن کی اپیلوں کو نظرانداز کرتے ہوئے کہا کہ حزب اللہ کے خلاف حملے جاری رہیں گے، جبکہ امریکی حکام نے نیویارک میں اقوام متحدہ کے اجلاس کے دوران جنگ بندی کے امکانات پر مذاکرات جاری رکھے۔ اسرائیلی حکومت نے اس پیشکش کو بھی مسترد کیا جس میں لبنان سے ہونے والے حملوں کی روک تھام کے لیے 21 دن کی عارضی جنگ بندی شامل تھی۔

لبنان میں جاری اسرائیلی حملوں میں سینکڑوں افراد ہلاک ہو چکے ہیں، جس کے باعث خطے میں ایک بڑی جنگ کا خطرہ پیدا ہو گیا ہے۔ اسرائیل نے اپنے حملوں میں حزب اللہ کے کئی رہنماؤں کو نشانہ بنایا ہے، جبکہ امریکہ نے بارہا جنگ بندی کی ضرورت پر زور دیا ہے تاکہ تنازعہ مزید نہ پھیلے۔

اس دوران فرانسیسی صدر ایمانوئل میکرون نے بھی امریکہ سے اسرائیل پر دباؤ بڑھانے کی اپیل کی تاکہ لبنان میں انسانی جانوں کے تحفظ کے لیے جنگ بندی کی جا سکے۔ امریکی حکومت پر بھی بین الاقوامی سطح پر اس بات کی تنقید ہو رہی ہے کہ وہ اسرائیل پر اپنا اثر و رسوخ استعمال کرنے میں ناکام رہی ہے، حالانکہ امریکی فوجی امداد اسرائیل کے لیے مسلسل جاری ہے۔