فلپائن میں 250 افراد سے بھری کشتی میں آگ لگنے کا ہولناک واقعہ، 12 افراد ہلاک، 7 لاپتہ

منیلا: جنوبی فلپائن میں بدھ کی دیر رات تقریباً 250 سے زیادہ افراد کو لے جانے والی ایک کشتی میں آگ لگنے سے کم از کم 12 مسافر ہلاک ہو گئے، جبکہ 7 افراد لاپتہ بتائے جا رہے ہیں۔ ایک مقامی اہلکار نے جمعرات کو یہ اطلاع دی۔

باسیلان صوبے میں آفات سے نمٹنے اور بندوبست کے دفتر کے سربراہ نکسن الونزو نے مقامی ریڈیو کو بتایا کہ سمندر میں چھلانگ لگانے والے سات مسافر لاپتہ ہیں۔ کم از کم 195 مسافروں اور عملے کے 35 ارکان کو بچا لیا گیا ہے۔

انہوں نے کہا کہ امدادی کارکنوں کو جہاز پر چار لاشیں ملی ہیں۔ جبکہ چھ کو ساحل پر لایا گیا۔ الونزو نے کہا کہ مسافروں کی موت پانی میں کودنے کے بعد ڈوبنے سے ہوئی اور کچھ اس دوران زخمی ہوئے ہیں۔ انہوں نے کہا کہ جان گنوانے والوں میں کم از کم تین بچے شامل ہیں، جو بظاہر اپنے والدین سے بچھڑ گئے تھے، جبکہ کم از کم 23 مسافر زخمی ہوئے ہیں، جنہیں اسپتال لے جایا گیا۔

انہوں نے بتایا کہ کشتی جولو سے زامبوانگا شہر جا رہی تھی کہ بدھ کو مقامی وقت کے مطابق رات 10 بجے باسیلان صوبے کے حاجی محمد شہر کے بلُک-بلُک جزیرے پر آگ بھڑک اٹھی۔ فلپائنی کوسٹ گارڈ نے واقعے کی تصدیق کرتے ہوئے کہا کہ اس نے تلاش اور بچاؤ آپریشن میں مدد کے لیے اہلکار اور ایک بحری جہاز تعینات کیا ہے، تاہم ہلاکتوں کے بارے میں تفصیلات نہیں بتائیں۔

(یو این آئی ان پٹ کے ساتھ)