حزب اللہ کو بڑی قیمت چکانی پڑے گی، لبنان میں سلسلہ وار دھماکوں کے درمیان اسرائیل کی دھمکی

لبنان کی راجدھانی بیروت میں پیجر کے بعد واکی-ٹاکی اور سولر پینل میں سلسلہ وار دھماکوں کے بعد لوگوں میں زبردست خوف کا ماحول ہے۔ پہلے منگل کو پیجر دھماکہ میں کئی لوگوں کی جان چلی گئی اور ہزاروں زخمی ہوئے، اس کے کچھ گھنٹوں بعد واکی-ٹاکی، پھر سولر پینل کے ساتھ موبائل میں بھی دھماکوں کی اطلاعات ہیں۔ ان دھماکوں میں مجموعی طور پر 32 لوگوں کی موت ہوئی ہے اور 3 ہزار سے زیادہ لوگ زخمی ہو گئے ہیں۔

لبنان میں ہو رہے مسلسل دھماکوں کے درمیان اسرائیلی فوج کے جنرل ہرزی حلیوی نے بدھ کو اسرائیل کی شمالی کمان کا دورہ کیا اور سیکورٹی نظام کا معائنہ کرتے ہوئے علاقے میں دفاعی اور جارحانہ منصوبوں کو منظوری دی۔ اس موقع پر جنرل ہرزی نے حزب اللہ کو بڑی قیمت چکانے کی دھمکی دی۔

کمانڈروں سے خطاب کرتے ہوئے جنرل ہرزی نے کہا کہ "ابھی بھی ہم ایسی کئی صلاحیتوں سے مزین ہیں جنہیں ہم نے ابھی تک فعال نہیں کیا ہے۔ جب بھی ہم کسی متعین مرحلہ کے لیے کام کر رہے ہوتے ہیں تو اگلے دو مرحلوں پر پہلے سے ہی آگے بڑھنے کے لیے تیار رہتے ہیں۔ جنگ کے ہر مرحلے میں حزب اللہ کو زیادہ سے زیادہ قیمت چکانی پڑے گی۔‘‘

وہیں اسرائیل کے دفاعی وزیر یوو گیلنٹ بھی بدھ کو شمالی اسرائیل میں رمت-ڈیوڈ ایئر فورس بیس پہنچے اور انہوں نے لبنان میں ہوئے دھماکوں کا بالواسطہ طور پر ذکر کیا۔ گیلنٹ نے کہا کہ اس جنگ میں ایک نئے عہد کی شروعات ہونے والی ہے اور ہمیں خود کو اس کے موافق بنانے کی ضرورت ہے۔ انہوں نے ملک کی سیکورٹی ایجنسی شن بیٹ اور اس کی خفیہ ایجنسی موساد کے ساتھ مل کر اسرائیلی دفاعی طاقتوں (آئی ڈی ایف) کی بہترین حصولیابیوں کی بھی تعریف کی۔

اس سے پہلے سی این این نے دعویٰ کیا تھا کہ منگل کا آپریشن آئی ڈی ایف اور موساد کی مشترکہ کوشش تھی لیکن گیلنٹ نے پہلی مرتبہ ایسا بیان دیا ہے، جس میں کسی اسرائیلی افسر نے واضح طور سے سلسلہ وار دھماکوں میں اسرائیل کے کردار کو قبول کیا ہے۔

غور طلب رہے کہ برطانوی نیوز ایجنسی رائٹرز نے دعویٰ کیا تھا کہ اسرائیل کی خفیہ ایجنسی موساد نے حزب اللہ کے 5 ہزار پیجر میں دھماکہ خیز مواد لگائے تھے۔ دھماکے میں 12 لوگوں کی موت ہوئی تھی جبکہ  پیجر پھٹنے سے 3 ہزار سے زیادہ زخمی ہو گئے تھے۔ بدھ کو واکی ٹاکی اور سولر پینل میں سلسلہ وار دھماکوں سے لبنان میں افرا تفری پھیلی ہوئی ہے۔ اس میں 500 سے زیادہ لوگ بُری طرح جھلس گئے ہیں۔