سابق سالیسٹر جنرل ہریش سالوے نے 65 سال کی عمر میں کی دوسری شادی، دلہن کے ساتھ دیکھیے تصویریں

ہندوستان کے سابق سالیسٹر جنرل ہریش سالوے کے بارے میں گزشتہ کئی دنوں سے میڈیا میں خبریں چل رہی تھیں کہ وہ 65 سال کی عمر میں دوسری شادی کرنے والے ہیں، اور آج ایک سادہ تقریب کے دوران وہ رشتہ ازواج میں منسلک بھی ہو گئے۔ سپریم کورٹ کے سب سے مہنگے وکیلوں میں شامل ہریش سالوے نے لندن کی کیرولن بروسارڈ کے ساتھ شادی کی۔ دونوں نے لندن کے ایک چرچ میں ایک دوسرے کا ہاتھ تھاما۔

قابل ذکر ہے کہ ہریش سالوے نے اسی سال اپنی پہلی بیوی میناکشی سالوے سے طلاق لے لیا تھا۔ ہریش سالوے کی دوسری بیوی کیرولن کی بھی پہلے شادی ہو چکی ہے اور وہ پہلے ہی طلاق لے چکی تھیں۔ پیشے سے اداکار اور عیسائی مذہب سے تعلق رکھنے والی کیرولن کی عمر 56 سال ہے اور میڈیا ذرائع میں آ رہی خبروں کے مطابق ان کو پہلی شادی سے ایک بیٹی بھی ہے۔ جہاں تک ہریش سالوے کی بات ہے، تو ان کو بھی پہلی شادی سے دو بیٹیاں ہیں۔ بڑی بیٹی کا نام ساکشی اور چھوٹی کا نام ثانیہ ہے۔

سالوے اور کیرولن کے رشتے کے تعلق سے بتایا جاتا ہے کہ دونوں کی پہلی ملاقات آرٹ نمائش کے دوران ہوئی تھی۔ دھیرے دھیرے دونوں کی ملاقاتیں بڑھنے لگیں اور دوستی ہو گئی۔ چونکہ دونوں ایک دوسرے کو بہت اچھے سے سمجھنے لگے تھے اور ساتھ وقت گزارنا اچھا لگتا تھا، اس لیے شادی کرنے کا فیصلہ لیا۔ اس درمیان ہریش سالوے نے اپنا مذہب ترک کرتے ہوئے عیسائی مذہب اختیار کر لیا۔ یہی سبب ہے کہ کیرولن اور سالوے نے عیسائی مذہب کے مطابق چرچ میں شادی کی رسمیں ادا کیں۔

واضح رہے کہ بنیادی طور پر مہاراشٹر میں ناگپور کے رہنے والے ہریش سالوے انٹرنیشنل کورٹ آف جسٹس میں ہندوستان کی طرف سے کلبھوشن جادھو کی پیروی کر چکے ہیں۔ سلمان خان کو سیاہ ہرن شکار معاملہ میں تین دن کے اندر پیشگی ضمانت دلانے والے وکیل بھی ہریش سالوے ہی تھے۔ اتنا ہی نہیں، ووڈافون، مکیش امبانی، رتن ٹاٹا اور آئی ٹی سی ہوٹلس کے کیس بھی سالوے لڑ چکے ہیں۔ کچھ جانکاروں کا کہنا ہے کہ سالوے ایک سماعت کے لیے تقریباً 5 لاکھ روپے فیس لیتے ہیں۔ اس وقت سالوے لندن میں رہ کر ہی ویڈیو کانفرنسنگ کے ذریعہ ہندوستان میں وکالت کر رہے ہیں۔