چین کے سابق وزیر اعظم لی کی چیانگ کا دل کا دورہ پڑنے سے انتقال

نئی دہلی: چین کے سابق وزیر اعظم لی کی چیانگ جمعہ کو انتقال کر گئے۔ ان کی عمر 68 برس تھی۔ چینی سرکاری میڈیا کے مطابق کی چیانگ کی موت دل کا دورہ پڑنے سے ہوئی۔ چین کے سرکاری ٹی وی چینل سی سی ٹی وی نے اطلاع دی ہے کہ لی کی چیانگ کچھ عرصے سے شنگھائی میں چھٹیاں گزار رہے تھے۔ انہیں 26 اکتوبر کو اچانک دل کا دورہ پڑا۔ انہیں بچانے کی ہر ممکن کوشش کی گئی لیکن وہ 27 اکتوبر کو چل بسے۔

2022 میں اپنی ریٹائرمنٹ تک، وہ حکمران کمیونسٹ پارٹی آف چائنا (سی سی پی) میں دوسرے سب سے طاقتور شخص تھے۔ 2012 اور 2022 کے درمیان پارٹی کے پولٹ بیورو کے رکن کے طور پر، وہ چین کے اعلی اقتصادی عہدیدار بھی رہے ہیں۔ انہوں نے مارکٹ کی اصلاحات میں اہم کردار ادا کیا۔

چین کی معروف پیکنگ یونیورسٹی سے تعلیم حاصل کرنے والے لی کو کبھی پارٹی قیادت کے دعویدار کے طور پر دیکھا جاتا تھا لیکن کہا جاتا ہے کہ صدر شی جن پنگ نے انہیں سائیڈ لائن کرنا شروع کر دیا تھا۔ لی کی چیانگ 2013 سے 2023 تک چین کے وزیر اعظم کے عہدے پر فائز رہ چکے ہیں۔ لی 1955 میں صوبہ انہوئی کے ہیفی میں پیدا ہوئے۔ ان کی شادی انگریزی زبان اور ادب کی سابق پروفیسر چینگ ہانگ سے ہوئی تھی۔