کرائسٹ چرچ حملہ کے بعد پہلی نماز جمعہ کی ادائیگی، پی ایم جیسنڈا کی اجتماع میں شرکت

کرائسٹ چرچ: نیوزی لینڈ کے شہر کرائسٹ چرچ میں دو مساجد پر ہوئے دہشت گردانہ حملوں کے بعد پہلی نماز جمعہ ادا کی گئی۔ سانحہ سے متاثرہ النور مسجد کے سامنے والے ہیگلے پارک میں نماز ادا کی گئی۔ نماز کے لئے ہونے والے اجتماع میں شرکت کے لیے نیوزی لینڈ کی وزیراعظم جیسنڈا آرڈرن بھی پہنچیں اور مسلمانوں اور شہیدوں کے اہل خانہ سے اظہاریکجہتی کیا۔

ہیگلے پارک میں مسلمانوں سے اظہار یکجہتی کے لیے مختلف مذاہب اورعقائد سے تعلق رکھنے والے افراد بھی بڑی تعداد میں موجود تھے جن میں مرد، خواتین اور بچے بھی شامل رہے۔

وزیراعظم نیوزی لینڈ جیسنڈا آرڈرن نے اس موقع پر مختصر پیغام میں رسول اکرم کی حدیث بیان کی اور کہا ’’اگر جسم کے ایک حصے میں تکلیف ہو تو بقیہ پورے جسم میں بھی درد ہوتا ہے۔ دکھ اور افسوس کی اس گھڑی میں ہم سب متحد ہیں اور عزم کرتے ہیں کہ آگے بھی متحد رہیں گے۔

ہم نیوزی لینڈ کی وزیر اعظم کے مشکور ہیں: پیش امام

پیش امام جمال فودا نے نماز جمعہ کے خطبے میں وزیراعظم نیوزی لینڈ اور وہاں کی عوام کا شکریہ ادا کیا۔ ان کا کہنا تھا کہ سانحہ کے بعد سیکیورٹی اہلکاروں اور پولس نے جو کردار ادا کیا ہم اس پر ان کے مشکور ہیں۔

انہوں نے کہا ،’’سانحہ کرائسٹ چرچ کے بعد ہماری حفاظت کے لیے جس طرح لوگوں نے اپنے گھروں کے دروازے کھولے اس پر ہم بے حد مشکور ہیں۔ ہم کسی کو اجازت نہیں دیں گے کہ وہ ہمیں تقسیم کردے۔ ‘‘ انہوں نے کہا کہ نیوزی لینڈ کو نقصان پہنچانے کی شیطانی کوشش ناکام ہوگئی ہے۔‘‘

جمال فودا مزید کہا، ’’وزیر اعظم جیسنڈا کی لیڈر شپ دنیا بھر کے لوگوں کے لیے ایک سبق اور مثال ہے۔ ہم عزم کرتے ہیں کہ مستقبل میں بھی ایک دوسرے کی حمایت کرتے رہیں گے۔‘‘ پیش امام جمال فودا نے خطبے میں کہا کہ سانحہ کرائسٹ چرچ نیوزی لینڈ کےلیے ایک نئی زندگی ثابت ہوا ہے۔

واضح رہے، کرائسٹ چرچ میں گزشتہ جمعہ سفید فام آسٹریلیائی دہشت گرد نے مساجد پر حملہ کر کے 50 مسلمانوں کو شہید کر دیا تھا۔ اس سانحے میں درجنوں افراد زخمی ہوئے تھے جن میں سے بیشتر ابھی تک اسپتالوں میں زیر علاج ہیں۔

سخت حفاظتی انتظامات

نماز جمعہ کی ادائیگی کے دوران بائیکر گینگ نے مساجد اور نمازیوں کی حفاظت کا فریضہ سرانجام دیا۔ خبررساں اداروں کے مطابق نیوزی لینڈ کے دیگر شہروں میں بھی مساجد کے باہر سیکیورٹی کے انتہائی سخت حفاظتی انتظامات کیے گئے تھے۔

سرکاری سطح پر اذان جمعہ ٹی وی اور ریڈیو پر نشر

نماز جمعہ سے قبل اذان کو سرکاری ٹی وی اور ریڈیو پرنشر کرنے کا اعلان وزیراعظم نیوزی لینڈ جیسنڈا آرڈرن نے کیا تھا۔ عالمی خبررساں ایجنسی کے مطابق جمعہ کی اذان ٹی وی اور ریڈیو پر نشر کرنے کا مقصد مسلمانوں کے ساتھ اظہار یکجہتی کرنا اور انہیں اس بات کی یقین دہانی کرانا تھا کہ وہ نہ صرف ملک میں محفوظ ہیں بلکہ آرام و سکون سے اپنی مذہبی عبادات بھی کرسکتے ہیں۔