کیلیفورنیا میں دھول بھرے طوفان سے عوامی زندگی مفلوج، ہائی وے بند، بجلی معطل

امریکی ریاست کیلیفورنیا کے سینٹرل ویلی میں ایک شدید دھول بھرے طوفان نے عوامی زندگی کو مفلوج کر دیا۔ اس طوفان نے ہائی وے 152 پر متعدد گاڑیوں کے تصادم اور بجلی کے تعطل کا سبب بن کر ہزاروں لوگوں کو پریشانی میں مبتلا کر دیا۔ اس موسمی طوفان کو مقامی زبان میں ’ہبوب‘ کہا جاتا ہے۔ اطلاعات کے مطابق، لاس اینجلس سے 400 کلومیٹر شمال میں چاوچلا کے قریب اس طوفان کے باعث حد نگاہ صفر ہو گئی، جس سے ہائی وے پر ٹریفک بند ہو گیا اور گاڑیوں کی لمبی قطاریں لگ گئیں۔

کیلیفورنیا ہائی وے پیٹرول کے مطابق، مقامی وقت کے مطابق دوپہر ایک بجے کے قریب اس طوفان نے حد نگاہ کو اتنا کم کر دیا کہ ہائی وے 152 پر ایک سیمی ٹرک سمیت تقریباً 20 گاڑیاں آپس میں ٹکرا گئیں، جس کے نتیجے میں کئی افراد کو معمولی زخم آئے اور انہیں ہسپتال منتقل کیا گیا۔

اسی دوران، فریسنو کاؤنٹی میں دھول بھرے طوفان نے بجلی کی لائنیں گرا دیں، جس سے 12000 سے زائد افراد بجلی سے محروم ہو گئے۔ ایک واقعے میں ایک درخت نصف ٹوٹ کر ایک اپارٹمنٹ کمپلیکس کے قریب کار پورٹ پر گر گیا، جس سے قریب کھیلنے والے بچے بال بال بچ گئے۔

مقامی رہائشی کارلا سانچیز نے اے بی سی 30 سے بات کرتے ہوئے بتایا، ’’ایک خوفناک آواز تھی، بچوں کو بہت ڈر لگا۔" انہوں نے مزید کہا، "میرے بچے چیختے ہوئے بھاگ کر اندر آئے، جب میں باہر گئی تو دیکھا کہ درخت گرا ہوا ہے اور اس کے نیچے موجود تمام چیزیں اور گاڑیاں کچلی ہوئی تھیں۔"

امریکی نیشنل ویدر سروس کے ہینفورڈ دفتر کی پیشگو کار اینٹونٹ سیراٹو کے مطابق یہ ایک دھول کی دیوار تھی، جو بہت کم دیکھنے میں آتی ہے۔ سیراٹو نے کہا کہ یہ غیر معمولی واقعہ تھا جو عام حالات میں بہت کم رونما ہوتا ہے۔