صدارتی انتخاب میں فیصلہ کن برتری کے بعد ٹرمپ کا خطاب، عوام کی خدمت کا عزم

ڈونلڈ ٹرمپ نے امریکی صدارتی انتخابات میں فیصلہ کن برتری حاصل کر لی ہے اور وہ اکثریت سے محض تین ووٹ پیچھے ہیں۔ دریں اثنا انہوں نے اپنے خطاب میں امریکی عوام کا شکریہ ادا کرتے ہوئے ملک کو دوبارہ عظیم بنانے کا عزم ظاہر کیا۔ اپنے خطاب میں انہوں نے کہا، ’’یہ ایک تاریخی کامیابی ہے جو پہلے کسی کو حاصل نہیں ہوئی۔" ٹرمپ نے اس موقع پر امریکی عوام کو مخاطب کرتے ہوئے کہا کہ وہ اپنی آخری سانس تک امریکہ کی خدمت کرتے رہیں گے اور ملک کو ترقی کی راہ پر لے جائیں گے۔

ٹرمپ نے اپنی تقریر میں زور دیتے ہوئے کہا کہ یہ جیت صرف اُن کی نہیں بلکہ ہر امریکی کی جیت ہے۔ انہوں نے ملک کے مختلف ریاستوں سے ملنے والی حمایت پر ان ریاستوں کے نام لے کر وہاں کے لوگوں کا شکریہ ادا کیا۔ ان کا کہنا تھا کہ امریکی عوام نے ایک اہم موڑ پر صحیح کا انتخاب کیا اور یہ تبدیلی تاریخی اہمیت رکھتی ہے۔

ٹرمپ نے خطاب کے دوران مشہور صنعتکار ایلون مسک کا بھی ذکر کیا اور ان کی خدمات کی تعریف کی۔ ان کا کہنا تھا کہ امریکہ نے حالیہ برسوں میں کئی مشکل مراحل دیکھے ہیں، لیکن اب وقت آگیا ہے کہ ہم سب مل کر ملک کی مشکلات کا حل نکالیں اور اسے ایک مرتبہ پھر عظیم ریاست بنائیں۔

ٹرمپ نے اپنی تقریر میں بارڈر سیکورٹی اور ملک میں غیر قانونی داخلوں کے حوالے سے بھی سخت اقدامات کا عندیہ دیا۔ انہوں نے کہا کہ ان کی حکومت غیر قانونی گھسنے والوں کو روکنے کے لیے سرحدوں کو سیل کرے گی اور صرف قانونی طریقے سے آنے والوں کو ہی اجازت دی جائے گی۔ ان کا کہنا تھا کہ سرحدوں کی مضبوطی اور ملکی سلامتی ان کی اولین ترجیح ہوگی تاکہ امریکی عوام کی حفاظت یقینی بنائی جا سکے۔

انہوں نے عالمی امن کے قیام کے لیے جنگوں کو روکنے کا عہد بھی کیا۔ ان کا کہنا تھا کہ وہ ایسی حکمت عملی اپنائیں گے جو نہ صرف امریکہ بلکہ پوری دنیا کے لئے امن و امان کا پیغام ثابت ہو۔ انہوں نے اس موقع پر اپنی بیوی، میلانیا ٹرمپ، اپنے بچوں اور والد کا ذکر کرتے ہوئے ان کی حمایت کا بھی شکریہ ادا کیا۔

ٹرمپ نے اپنے خطاب کے اختتام پر کہا کہ ان کے لیے یہ جیت بہت معنی رکھتی ہے اور وہ امریکی عوام کے لئے ہمیشہ لڑتے رہیں گے۔ ان کا کہنا تھا کہ "یہ سب کچھ امریکہ کے لئے ہے اور ہم سب مل کر اس ملک کو نئی بلندیوں پر لے جائیں گے۔"