ڈونالڈ ٹرمپ اور ایلن مسک کی یوکرینی صدر زیلنسکی سے فون پر گفتگو، پوتن سے اب تک نہیں ہوئی بات

امریکہ کے نومنتخب صدر ڈونالڈ ٹرمپ نے انتخابی فتح کے بعد پہلی مرتبہ یوکرین کے صدر ولادیمیر زیلنسکی سے فون پر بات کی ہے۔ خاص بات یہ ہے کہ فون کال پر ان کے ساتھ دنیا کے امیر ترین صنعت کار ایلن مسک بھی موجود تھے۔ حالانکہ ٹرمپ نے ابھی تک روس کے صدر ولادیمیر پوتن سے بات نہیں کی ہے۔ واضح ہو کہ ڈونالڈ ٹرمپ نے اپنی انتخابی مہم کے دوران یوکرین کو دی جانے والی اقتصادی امداد کی مخالفت کی تھی۔ اس کے بعد سے ہی یوکرین فکرمند تھا۔ مگر اب دونوں رہنماؤں کے درمیان مثبت بات چیت ہوئی ہے۔

ڈونالڈ ٹرمپ اور ایلن مسک کا ایک ساتھ زیلنسکی سے بات کرنا اس طرف اشارہ دے رہا ہے کہ مسک کتنے با اثر شخصیت ہیں اور ان کا ٹرمپ انتظامیہ میں ایک الگ رتبہ ہوگا۔ ساتھ ہی انہیں ٹرمپ کے ذریعہ اہم ذمہ داری ملنے کی بھی بات کی جا رہی ہے۔ اس سے پہلے بھی ایلن مسک ترکی کے صدر رجب طیب اردغان کے ساتھ ٹرمپ کی کال میں حصہ لے چکے ہیں۔

انتخابی مہم کے دوران ڈونالڈ ٹرمپ نے کہا تھا کہ وہ صدر کا عہدہ سنبھالنے سے پہلے ہی روس اور یوکرین کا جنگ ختم کرا سکتے ہیں۔ اب اندازہ یہ لگایا جا رہا ہے کہ ٹرمپ کی زیلنسکی سے بات چیت اسی سمت میں تو نہیں ہوئی ہے۔ ویسے ٹرمپ جنوری مہینہ میں صدر کا عہدہ سنبھالیں گے۔

ایکسیوس کی رپورٹ کے مطابق گزشتہ دو مہینہ سے ڈونالڈ ٹرمپ اور زیلنسکی کی ٹیم کے درمیان بات چیت چل رہی ہے۔ بدھ کو ٹرمپ اور زیلنسکی کے درمیان تقریباً 25 منٹ تک بات چیت ہوئی۔ اس دوران زیلنسکی نے انہیں جیت کی مبارک باد پیش کی۔ زیلنسکی کا ماننا ہے کہ انتخاب جیتنے کے بعد ٹرمپ کا فون کرنا ایک مثبت اشارہ ہے۔ بات چیت میں ٹرمپ نے کہا کہ وہ یوکرین کی حمایت کریں گے جبکہ زیلنسکی نے کہا کہ بات چیت مثبت رہی۔ وہیں ایلنس مسک نے کہا کہ وہ اپنے اسٹارلنک سیارچوں کے توسط سے یوکرین کی حمایت کرنا جاری رکھیں گے۔