نیپال میں شدید بارشوں سے تباہی، درجنوں پل بہہ گئے، 100 سے زائد ہلاک

کھٹمنڈو: نیپال میں شدید بارشوں کی وجہ سے آنے والے سیلاب اور لینڈ سلائیڈنگ نے بڑے پیمانے پر تباہی مچائی ہے۔ رپورٹ کے مطابق اس لینڈ سلائیڈنگ اور سیلاب میں اب تک 112 افراد ہلاک ہو چکے ہیں اور بہت سے لوگ لاپتہ ہیں۔ مشرقی اور وسطی نیپال کا ایک بڑا حصہ جمعہ سے زیر آب ہے اور ملک کے کئی حصوں میں اچانک سیلاب آ گیا ہے۔

مسلح پولیس فورس کے ذرائع کے مطابق سیلاب اور لینڈ سلائیڈنگ کے باعث 64 افراد لاپتہ ہیں جبکہ 45 افراد زخمی ہوئے ہیں۔ وادی کھٹمنڈو میں سب سے زیادہ 48 افراد ہلاک ہوئے ہیں۔ کم از کم 195 مکانات اور 8 پلوں کو نقصان پہنچا ہے۔ سیکورٹی اہلکاروں نے تقریباً 3100 افراد کو بچا لیا۔

عینی شاہدین کے مطابق انہوں نے وادی کھٹمنڈو میں گزشتہ 40-45 سالوں میں اتنا تباہ کن سیلاب نہیں دیکھا۔ مسلح پولیس فورس نے ایک بیان میں کہا کہ مرنے والوں کی تعداد 112 تک پہنچ گئی ہے۔

انٹرنیشنل سینٹر فار انٹیگریٹڈ ماؤنٹین ڈیولپمنٹ (آئی سی آئی ایم او ڈی) کے آب و ہوا اور ماحولیات کے ماہر ارون بھکتا شریشٹھا نے ہفتہ کو آئی سی ایم او ڈی کی طرف سے شائع ہونے والی ایک رپورٹ میں کہا، ’’میں نے کھٹمنڈو میں اس شدت کا سیلاب پہلے کبھی نہیں دیکھا۔‘‘ آئی سی آئی ایم او ڈی نے کہا کہ کھٹمنڈو کی اہم ندی باگمتی جمعہ اور ہفتہ کو مشرقی اور وسطی نیپال میں طوفانی بارشوں کے بعد خطرے کے نشان سے اوپر بہہ رہی ہیں۔

اس نے کہا کہ خلیج بنگال میں کم دباؤ کے نظام اور مانسون کی صورتحال کی وجہ سے ہفتہ کو غیر معمولی شدید بارش ہوئی۔ سائنسدانوں کا کہنا ہے کہ موسمیاتی تبدیلیوں کی وجہ سے پورے ایشیا میں بارشوں کی مقدار اور وقت تبدیل ہو رہا ہے۔

نیپال کے کئی علاقوں میں سیلاب اور لینڈ سلائیڈنگ کی وجہ سے زندگی ٹھپ ہو کر رہ گئی ہے۔ کئی شاہراہیں اور سڑکیں بند ہیں، سینکڑوں گھر اور پل بہہ گئے ہیں اور سینکڑوں خاندان بے گھر ہو گئے ہیں۔ سڑک بلاک ہونے کی وجہ سے ہزاروں مسافر مختلف مقامات پر پھنسے ہوئے ہیں۔