کیپٹل ہل تشدد میں ہندوستانی پرچم لہرانے والے شخص کے خلاف شکایت درج

امریکی پارلیمنٹ کیپٹل ہل کے باہر صدر ڈونالڈ ٹرمپ حامی بھیڑ کے ذریعہ تشدد کیے جانے کا معاملہ اب ٹھنڈا پڑ گیا ہے، لیکن اس تشدد میں ہندوستانی پرچم لہرانے کا معاملہ فی الحال ٹھنڈا پڑتا ہوا معلوم نہیں پڑ رہا ہے۔ تازہ ترین خبروں کے مطابق اس شخص کے خلاف دہلی پولس میں ایک شکایت درج کی گئی ہے اور مطالبہ کیا گیا ہے کہ ضروری کارروائی کی جائے۔

کیپٹل ہل کے باہر ہوئے تشدد میں جس شخص نے ہندوستانی پرچم لہرایا تھا اس کا نام ونسینٹ جیویر بتایا جاتا ہے اور ایسی بھی خبریں سامنے آئی ہیں کہ وہ ہندوستان کا شہری ہے۔ اسے کیپٹل ہل میں ترنگا ہاتھ میں لیے ٹرمپ حامیوں کے ساتھ دیکھا گیا تھا۔ تشدد کے دوران ایک ویڈیو میں ترنگا نظر آنے پر کئی لوگوں نے اعتراض ظاہر کیا اور یہی وجہ ہے کہ دہلی پولس میں شکایت درج کی گئی ہے۔

واضح رہے کہ بی جے پی رکن پارلیمنٹ ورون گاندھی نے بھی اپنے ٹوئٹر ہینڈل سے وہ ویڈیو شیئر کیا تھا جس میں کیپٹل تشدد کے دوران کئی ٹرمپ حامی افراد کے ہاتھوں میں امریکی پرچم تھا، جب کہ ان سبھی کے ساتھ ایک ہندوستانی پرچم بھی لہراتا نظر آیا تھا۔ ورون گاندھی نے یہ ویڈیو پوسٹ کرتے ہوئے لکھا تھا کہ ’’وہاں ہندوستانی پرچم کیوں ہے؟ یہ ایک ایسی لڑائی ہے جس میں ہمیں قطعاً حصہ لینے کی ضرورت نہیں ہے۔‘‘