امریکہ کے مغربی ساحل پر 6.0 شدت کا زلزلہ، لوگوں میں دہشت، چین میں بھی محسوس کیے گئے جھٹکے

امریکہ کے مغربی ساحل پر جمعرات کو زلزلہ کا شدید جھٹکا محسوس کیا گیا۔ جس سے لوگ شدید خوفزدہ ہو گئے ہیں۔ نیوز ایجنسی اے ایف پی نے امریکی جیولوجیکل سروے کے حوالے سے بتایا کہ 6.0 شدت کا زلزلہ بحرالکاہل کے نیچے ایک فالٹ لائن پر آیا جو اوریگن ریاست کے بینڈن شہر سے 279 کلو میٹر فاصلہ پر ہے۔ حالانکہ زلزلہ کے بعد سُنامی کو لے کر کوئی وارننگ جاری نہیں کی گئی ہے۔اے پی کے مطابق 75 سے زیادہ لوگوں نے زلزلہ سے ہلکی کمپن محسوس ہونے کی اطلاع دی ہے۔ راحت کی بات یہ ہے کہ زلزلہ سے کسی بھی طرح کے نقصان کی اب تک کوئی اطلاع نہیں ہے۔

واشنگٹن ریاست کے ہنگامی انتظام کے افسران نے سوشل میڈیا پر پوسٹ کرکے لکھا ہے کہ کسکیڈیا سبڈکشن زون کے پاس 6.0 شدت کا زلزلہ آنا خوفناک ہو سکتا ہے لیکن بدھ کو آیا زلزلہ بلینکو فریکچر زون مٰں تھا، جہاں زلزلہ آنا عام سی بات ہے۔ کیسکیڈیا سبڈکشن زون ساحل سے کچھ ہی دور 600 میل لمبا (965 کلومیٹر) فالٹ ہے، جو شمالی کیلیفورنیا سے برٹش کولمبیا تک پھیلا ہوا ہے۔ اس علاقے میں 300 سے زیادہ برسوں سے ٹکٹونک تناؤ جمع ہو رہا ہے اور زلزلہ سائنسدانوں کا کہنا ہے کہ یہ کبھی بھی ٹوٹ سکتا ہے جس سے بہت بڑا زلزلہ اور سنامی آ سکتی ہے۔

دوسری طرف چین کے شیزانگ میں بھی زلزلہ آنے کی خبر ہے۔ اے این آئی نے نیشنل سینٹر فار سسمولاجی (این سی ایس) کے حوالے سے بتایا کہ جمعرات کی صبح چین کے شیزانگ میں ریختر پیمانے پر 4.5 شدت کے زلزلہ کے جھٹکے محسوس کیے گئے۔ این سی ایس کے مطابق یہ زلزلہ صبح 7.02 (IST) بجے آیا۔