افغانستان: خودکش کار بم دھماکہ میں 11 اسکولی بچے ہلاک

افغانستان میں ہوئے خودکش کار بم دھماکہ میں آج کم و بیش 11 اسکولی بچے ہلاک ہو گئے۔ اس خود کش دھماکہ میں پانچ رومانین فوجی سمیت 16 لوگوں کے زخمی ہونے کی بھی اطلاعات موصول ہو رہی ہیں۔ ذرائع کے مطابق افغانستان کے قندھار علاقے میں یہ دھماکہ ایک اسکول اور مسجد کے قریب ہوا۔ آج افغانستان میں یہ تیسرا خودکش دھماکہ ہے۔ اس سے قبل دارالحکومت کابل میں ہوئے دو خودکش دھماکوں میں کم و بیش 29 لوگ ہلاک ہو چکے ہیں۔

قندھار کے قریب ہوئے تازہ خودکش دھماکہ سے متعلق میڈیا ذرائع کا کہنا ہے کہ افغانستان کے جنوبی علاقے میں یہ دھماکہ بیرون ملکی فوجی قافلے کو نشانہ بنا کر کیا گیا تھا جس میں اسکول کے معصوم بچے جاں بحق ہو گئے۔ مقامی پولس کے ترجمان قاسم افغا نے ایک نیوز ایجنسی کو اس سلسلے میں بتایا کہ جنوبی علاقے کے قندھار میں بم سے لدی کار کے ذریعہ کیے گئے دھماکہ میں بیرون ملکی اور افغان فوجی فورس کے 16 دیگر لوگ زخمی ہوئے ہیں۔