پاکستان میں منکی پاکس کا پانچواں کیس رپورٹ، نیوزی لینڈ نے منکی پاکس ویکسین کی منظوری دے دی

پاکستان میں منکی پاکس کا پانچواں کیس سامنے آگیا ، 33 سالہ شخص 7 ستمبر کو سعودی عرب سے آیا تھا۔ تفصیلات کے مطابق ملک میں ایم پاکس کاپانچواں کیس رپورٹ ہوا، ترجمان وزارت صحت نے بتایا کہ شہری کا تعلق لوئر دیر اور سفر کی ہسٹری خلیجی ممالک سے ہے۔

ترجمان کا کہنا تھا کہ تینتیس سالہ شخص سات ستمبر کو سعودی عرب سے پاکستان آیا۔ پشاور کے ہوٹل میں قیام کیا تاہم متاثرہ مریض تندرست ہے گھر پر آئیسولیٹ کر دیا گیا ہے۔ترجمان نے بتایا کہ وزارت صحت اورصوبے صورتحال پرکڑی نظررکھےہوئےہیں اور بارڈرہیلتھ سروسزکاعملہ ایئرپورٹ پر اسکریننگ کے نظام کو یقینی بنا رہا ہے۔

دوسری جانب نیوزی لینڈ کی حکومت نے منکی پاکس کے دو نئے تصدیق شدہ کیسوں پر فوری ردعمل ظاہر کرتے ہوئے اس کی ویکسین کے استعمال کی منظوری دے دی ہے۔ نیوزی لینڈ کی میڈیکل سیفٹی اتھارٹی 'میڈ سیف' نے منکی پاکس ویکسین جینیوس کو عارضی منظوری دے دی ہے۔

وزیر صحت شین ریتی نے بدھ کے روز کہا کہ میڈیسن ایکٹ کی ایک مخصوص شق کے تحت، جنیوس کو نیوزی لینڈ میں 2023 سے استعمال کیا جا رہا ہے تاکہ سب سے زیادہ خطرے والے لوگوں میں منکی پاکس کو روکا جا سکے۔

محققین نے کہا کہ نیوزی لینڈ نے منکی پاکس کے دو نئے کیسز کی تصدیق کی ہے، جن کے بارے میں خیال کیا جاتا ہے کہ وہ اگست میں ہونے والے کوئنس ٹاؤن ونٹر پرائیڈ ایونٹ سے منسلک ہیں۔ یہ کلیڈ II منکی پاکس کے معاملات ہیں، جو زیادہ سنگین کلیڈ I سے زیادہ عام ورژن ہے۔

ڈبلیو ایچ او کے مطابق دنیا میں اب تک منکی پاکس کے ایک لاکھ سے زائد کیسز رپورٹ ہو چکے ہیں۔ اعداد و شمار کے مطابق، نیوزی لینڈ میں 2022 سے اب تک 54 کیسز سامنے آئے ہیں، جن میں اس سال کم از کم پانچ شامل ہیں۔منکی پاکس زیادہ تر جسمانی رابطے کے ذریعے پھیلتا ہے اور اسے کووڈ-19 کی طرح ہوا سے پھیلنے والا انفیکشن نہیں سمجھا جاتا ہے۔