’سیل فون یا کمپیوٹر کا گھنٹوں تک مسلسل استعمال آنکھوں کے لئے ضرر رساں‘

جموں: ماہرین امرض چشم کا کہنا ہے کہ سیل فون یا کمپیوٹر کا کئی گھنٹوں تک مسلسل استعمال آنکھوں کے لئے ضرر رساں ثابت ہو سکتا ہے۔ ماہر امراض چشم ڈاکٹر غزال پوشپ نے یو این آئی کو بتایا کہ سیل فون یا کمپیوٹر کے کئی گھنٹوں تک مسلسل استعمال سے آنکھوں میں انفیکشن ہوسکتا ہے اور آنکھیں خشک ہوسکتی ہیں۔

ڈاکٹر غزال نے کہا ’'اگرچہ سیل فون، کمپیوٹر یا لیپ ٹاپ کی سکرین کے سامنے گزارنے کے لئے کوئی مقررہ اوقات نہیں ہے لیکن ان چیزوں کا طویل وقت تک مسلسل استعمال آنکھوں کی خشکی اور انفیکشن کا باعث بن سکتا ہے۔‘‘ موصوف ڈاکٹر نے کہا کہ ان گیجٹس کا استعمال کرنے کے لئے ایک قاعدہ ہے لیکن اس پر شاید ہی کوئی عمل کرتا ہے۔

انہوں نے کہا کہ لوگوں کو چاہئے کہ آنکھوں کے تحفظ کے لئے ان چیزوں کے استعمال کے دوران بیچ میں وقفہ کریں۔ انہوں نے کہا کہ کورونا کے پیش نظر شروع کئے جانے والے آن لائن کلاسز کی مدت کو دھیان میں رکھا جانا چاہئے۔ ڈاکٹر پوشپ نے کہا کہ آن لائن کلاس عام طور پر 45 منٹوں پر ہونا چاہئے اور دو کلاسوں کے بعد پندرہ سے بیس منٹوں کا وقفہ ہونا چاہئے۔

انہوں نے کہا کہ سیل فون، کمپیوٹر یا لیپ ٹاپ کی اسکرین کے سامنے بیٹھنے کے دوران آنکھوں کے پٹھوں کا آرام لازمی ہے۔موصوفہ نے کہا کہ سونے سے چند منٹ قبل موبائل فون کا استعمال نہیں کرنا چاہئے کیونکہ اس سے نیند میں خلل واقع ہوتی ہے اور آنکھوں میں بھی انفیکشن ہوجاتا ہے۔انہوں نے کہا کہ آنکھوں پر غیر ضروری دباؤ ڈالنے سے احتراز کیا جانا چاہئے۔