پاکھی ہیگڑے اوراداکار علی ظفر یو پی آرٹسٹ ایوارڈ سے سرفراز

ایک پررونق تقریب میں اتر پردیش کے سینئر آئی اے ایس افسر اونیش اوستھی نے اداکارہ پاکھی ہیگڑے اور اداکار علی ظفر کویو پی آرٹسٹ ایوارڈ سے سرفرازکیا۔ اس موقع پر اتر پردیش کے نائب وزیر اعلیٰ، بالی ووڈ کے کئی بڑے اداکاروں اور اداکار سمیت کئی بڑی ہستیوں کا جھرمٹ تھا۔ اترپردیش آرٹسٹ ایوارڈ اترپردیش حکومت کی طرف سے سماج کے مختلف شعبوں میں کارہائے نمایاں انجام دےنے والے شخص کو دیا جاتا ہے۔

اس موقع پر پاکھی ہیگڑے نے اپنے خیالات کا اظہار کرتے ہوئے کہا کہ یہ ان کے لیے بڑے فخر کی بات ہے کہ انھیں اتر پردیش کے اس باوقار اعزاز کے لیے منتخب کیا گیا۔ اس سے انہیں اپنے کام میں عمدگی لانے کی ترغیب ملے گی اور مستقبل میں بھی وہ بہتر کام کرنے کی کوشش کریں گی تاکہ معاشرے پر اس کا مثبت اثر پڑسکے اور نوجوانوں کی سوچ معاشرے کے مفاد میں کام کرے۔ اس موقع پر سبھی لوگوں کا شکریہ ادا کرتے ہوئے پاکھی ہیگڑے نے کہا کہ آج اس موقع پر ہم اس تقریب کے چیئرمین نتن مشرا جی، وامق خان جی، پرمود گپتا جی، اونیش اوستھی جی کی مشکور ہیں۔

خیال رہے کہ فلم اور تفریحی دنیا میں پاکھی ہیگڑے کسی تعارف کی محتاج نہیں۔ انہوں نے اس فلم انڈسٹری میں جو بھی کام کیا ہے، وہ اپنے آپ میں آج کی اداکاراؤں کے لیے ایک سنگ میل کی حیثیت رکھتاہے۔ پاکھی ہیگڑے نے کئی فلموں اور ٹی وی سیریلوں میں بااثر کرداروں کے لیے متعددانعامات اور اعزازات حاصل کیے ہیں۔ یہاں پاکھی ہیگڑے کی شخصیت میں مزید چار چاند لگ گیا جب انہیں اترپردیش آرٹسٹ ایوارڈ سے نوازا گیا۔ اس موقع پر پاکھی ہیگڑے کے ساتھ بالی ووڈ کے مشہور اداکار علی ظفر کو بھی اعزاز سے نوازا گیا۔