لتا منگیشکر کو بہن مانتے تھے دلیپ کمار

فلم انڈسٹری کے 'شہنشاہ جذبات' کہے جانے والے مرحوم اداکار دلیپ کمار اور سروں کی ملکہ لتا منگیشکر کو بہن مانتے تھے۔ لتا نے متعدد مرتبہ دلیپ کمار کے ہاتھوں پر راکھی باندھی تھی۔ دلیپ کمار کے انتقال سے قبل جب لتا پہلی مرتبہ اسپتال میں داخل ہوئی تھیں، اس وقت دلیپ صاحب نے اپنے ٹوئٹر پر کلمات ادا کرتے ہوئے ان کی صحتیابی کے لئے دعائیں کی تھیں۔ اسی طرح جب دلیپ صاحب داعی اجل کو لبیک کہہ گئے تب لتا منگیشکر نے ایک جذباتی پیغام میں اپنے بھائی کو کھو دینے کا اظہار کیا تھا اور کہا تھا کہ اب ان کی راکھی اپنے بھائی کی کلائی سے محروم ہو جائے گی۔

لتا منگیشکر کے تعلق سے ایک مرتبہ دلیپ صاحب نے یہ بھی کہا تھا کہ قدرت نے ہندوستان کو ایک خاص تحفہ دیا ہے اور اس تحفہ کا نام لتا منگیشکر ہے۔ واقعی لتا منگیشکر کی آواز کا اعجاز جادو اور سحر کے زمرے میں آتا ہے- لندن کے البرٹ ہال میں منعقدہ ایک پروگرام میں دلیپ نے لتا منگیشکر کا تعارف کچھ اس طرح کرایا تھا کہ وہ تعارف بھی جاوداں بن گیا۔

دلیپ کمار نے کہا تھا کہ 'حضرات! جس طرح پھول کی خوشبو اور مہک کا کوئی رنگ نہیں ہوتا وہ محض خوشبو ہوتی ہے یا جس طرح بہتے پانی، جھرنے یا ہوا کا کوئی مسکن، گاؤں یا دیس نہیں ہوتا، جس طرح ابھرتے ہوئے سورج کی کرنوں کا یا معصوم بچے کی مسکراہٹ کا کوئی مذہب یا بھید بھاؤ نہیں ہوتا ویسے ہی لتا منگیشکر کی آواز قدرت کی تخلیق کا ایک کرشمہ ہے۔ اسی طرح کہ عوام کے ساتھ ساتھ فلم انڈسٹری بھی لتا دیدی کی مداح تھی۔

گلزار نے سروں کی ملکہ کے بارے میں کہا تھا کہ لتاجی کی آواز ہمارے عہد کا ثقافتی عجوبہ اور مظہر ہے۔ یہ ہماری روزمرہ زندگی کا حصہ ہے۔ کوئی دن ایسا نہیں گزرتا کہ ہم کم از کم ایک بار ان کی آواز نہ سنتے ہوں۔

نغمہ نگار جاوید اختر کہتے ہیں کہ اس کرہ ارض پر صرف ایک سورج، ایک چاند اور ایک لتا ہے۔ اداکارہ نرگس نے اپنی حیات میں لتا منگیشکر کے گانوں کا ذکر کرتے ہوئے کہا تھا کہ مجھے ان جذباتی گیتوں کو گاتے ہوئے جو لتا منگیشکر کی آواز میں ہوتے ہیں، آنکھوں میں گلیسرین ڈالنے کی ضرورت نہیں پڑتی۔

یہودی مینوہن نے لتا منگیشکر کے بارے میں کہا کہ میں وائلن پر آپ کی حیرت انگیز گائیکی کو بارِدگر تخلیق کرنے کی صرف کوشش ہی کر سکتا ہوں۔ ایک زمانہ لتا کا مداح تھا اور وہ استاد سلامت علی خاں کی دیوانی تھیں۔ استاد سلامت کو اپنے عہد کا تان سین مانا گیا۔ یہ عشق کے اساطیری جہاں کی عظیم داستان ہے کہ سرسوتی دیوی نے سُروں اور تال کے دیوتا سے عشق کیا تھا۔ لتا منگیشکر نے استاد سلامت علی خاں سے ٹوٹ کر محبت کی اور انھیں شادی کی پیشکش بھی کی تھی لیکن ہر لازوال محبت کی طرح اس کا انجام بھی ناکامی ٹھہرا۔