اداکار اکشے کمار نے حاجی علی درگاہ کو عطیہ کیے 1.21 کروڑ روپے، چادر پوشی بھی کی

بالی ووڈ کے مشہور اداکار اکشے کمار کا ستارہ ان دنوں گردش میں چل رہا ہے۔ ان کی فلمیں باکس آفس پر لگاتار فلاپ ہو رہی ہیں، لیکن وہ ان سب سے بے فکر اپنی آئندہ ریلیز ہونے والی فلموں کی شوٹنگ میں مصروف ہیں۔ اس درمیان انھوں نے ایک ایسا نیک کام کیا ہے جس سے وہ سرخیوں میں آ گئے ہیں۔

دراصل اکشے کمار کی فلم ’کھیل کھیل‘ میں آئندہ 15 اگست کو ریلیز ہونے والی ہے۔ اس سے عین قبل وہ ممبئی واقع حاجی علی درگاہ پہنچے اور وہاں چادر پوشی کی۔ انھوں نے اپنی آنے والی فلم کی کامیابی کے لیے دعا بھی مانگی۔ خاص بات یہ ہے کہ اکشے کمار نے حاجی علی درگاہ ٹرسٹ کو 1 کروڑ 21 لاکھ روپے کا عطیہ پیش کیا ہے۔ ٹرسٹ نے اس خبر کی تصدیق کی ہے اور بتایا ہے کہ درگاہ کی تجدید کے ایک حصہ کی ذمہ داری اکشے کمار نے لی ہے اور اس کے لیے انھوں نے 1.21 کروڑ روپے عطیہ بھی پیش کیا ہے۔

حاجی علی درگاہ مینجمنٹ نے اکشے کمار کے اس قدم کی تعریف کی ہے اور ان کا شکریہ بھی ادا کیا ہے۔ ٹرسٹ نے اکشے کمار کے اس نیک عمل پر اداکار کے آنجہانی والدین کے لیے خصوصی دعا بھی کی۔ ویسے اکشے کمار نیک دلی والا عمل پہلے بھی کرتے دیکھے گئے ہیں۔ ابھی زیادہ دن نہیں ہوئے ہیں جب اکشے کمار نے ضرورت مندوں کو کھانا کھلایا تھا۔ انھوں نے اپنے گھر پر ’گرو جی کا پاٹھ‘ رکھا تھا جس کی ویڈیو سوشل میڈیا پر دیکھنے کو ملی تھی۔ ویڈیو میں اکشے کمار اپنی بہن کے ساتھ اپنے گھر کے باہر کھانا تقسیم کرتے ہوئے نظر آئے تھے۔