خواتین ٹی-20: ہرمن پریت کی نصف سنچری، ہندوستان کی آسان جیت

ڈھاکہ: کپتان ہرمن پریت کور (ناٹ آؤٹ 54) کی نصف سنچری اور اسمرتی مندھانا (38) کے ساتھ ان کی 70 رنز کی شراکت کی بدولت ہندوستان نے پہلے خواتین ٹی ٹوئنٹی میں اتوار کو بنگلہ دیش پر سات وکٹ کی آسان جیت درج کی۔ بنگلہ دیش نے ہندوستان کے سامنے 115 رنوں کا معمولی ہدف رکھا جسے ہرمن پریت کی ٹیم نے 16.2 اوور میں تین وکٹوں کے نقصان پر حاصل کر لیا۔

اس یک طرفہ جیت میں ہرمن پریت نے دو چھکوں اور چھ چوکوں کی مدد سے 35 گیندوں پر ناقابل شکست 54 رنز بناتے ہوئے مندھانا کے ساتھ تیسرے وکٹ کے لیے 70 رنز کی شراکت داری کی۔ مندھانا ہدف تک پہنچنے سے پہلے ہی آؤٹ ہوگئیں لیکن ہرمن پریت نے 17ویں اوور کی دوسری گیند پر چوکا لگا کر ہندوستان کو جیت دلا دی۔

ہندوستان نے ٹاس جیت کر گیندبازی کا فیصلہ کیا اوررنوں پر لگام لگاتے ہوئے پاور پلے میں شمیمہ سلطان (13 گیند، 17 رنز) کا وکٹ نکالا۔ ابتدائی چار اوورز میں صرف 16 رنز بنانے کے بعد شمیمہ نے اپنا پہلا انٹرنیشنل میچ کھیلنے والی مینو مانی کو ایک چھکا اور ایک چوکا لگایا، تاہم اوور کی چوتھی گیند پر وہ جمائما روڈریگز کے ہاتھوں کیچ ہو کر پویلین لوٹ گئیں۔

پاور پلے کے بعد ساتھی رانی نے ساتویں اوور میں امنجوت کور کو تین چوکے لگا کر رن ریٹ بڑھانا چاہا لیکن وہ بھی آؤٹ ہونے سے پہلے 26 گیندوں پر 22 رنز ہی بنا سکیں۔ بنگلہ دیش کی اننگ میں بڑی شراکت کا نہ ہونا ان کا سب سے بڑا مسئلہ تھا۔ کپتان نگار سلطان سات گیندوں پر دو رنز بنا کر آؤٹ ہوئیں جبکہ شورنا اختر کے ساتھ چوتھے وکٹ کے لیے 21 رنز جوڑنے کے بعد شوبھنا موستاری بھی رن آؤٹ ہوگئیں۔

شوبھنا نے 33 گیندیں کھیلیں لیکن وہ دو چوکوں کی مدد سے 23 رنز ہی بنا سکیں۔ شورنا نے بالآخر ریتو مونی کے ساتھ پانچویں وکٹ کے لیے 33 رنز کی شراکت داری کرکے ٹیم کو باعزت اسکور تک پہنچایا۔ ریتو (13 گیند، 11 رن) آخری اوور کی پانچویں گیند پر رن آؤٹ ہوگئیں، جبکہ شورنا 28 گیند پر دو چھکوں کی مدد سے 28 رنز بنا کر ناٹ آؤٹ رہیں۔ مینوں نے تین اوور میں 21 رن دے کر ایک وکٹ حاصل کیا، جبکہ پوجا وستراکر (چار اوور، 16 رن) اور شیفالی ورما (تین اوور، 18 رن) کو بھی ایک ایک وکٹ ملا۔