وراٹ کوہلی کی 50ویں ون ڈے سنچری کے بعد یوپی ضلع کے ایک ریستوران پر بریانی کے لیے بھیڑ کیوں جمع ہو گئی؟

بہرائچ (یو پی): آئی سی سی ورلڈ کپ کے سیمی فائنل میں نیوزی لینڈ کے خلاف بلے بازی کرتے ہوئے وراٹ کوہلی نے اپنی 50 ویں سنچری اسکور کی۔ جس کے بعد پورے ملک نے خوشی کا اظہار کیا لیکن اتر پردیش کے بہرائچ میں ایک ریستوران پر بریانی کے لئے بھیڑ جمع ہو گئی۔ دراصل ریستراں کے مالک نے اعلان کیا تھا کہ سنچری جتنے بھی رنز بنائیں گے وہ بریانی پر اتنے ہی فیصد کی رعایت دیں گے۔

رپورٹ کے مطابق ریستران مالک نے جب کرکٹر وراٹ کوہلی کے رنز کے برابر رعایت کا اعلان کیا تھا تو بظاہر انہیں امید نہیں رہی ہوگی کہ کرکٹر ورلڈ کپ میں 100 رنز بنا دیں گے۔ ممبئی کے وانکھیڑے اسٹیڈیم میں وراٹ کی 50ویں سنچری کی وجہ سے دیہات پولیس کے علاقے ٹکونی باغ میں بریانی بیچنے والے ریسٹورنٹ میں بھگدڑ مچ گئی۔

کوہلی کی سنچری کے ساتھ، رعایت 100 فیصد ہو گئی، جس کا مطلب ہے کہ چکن اور مٹن بریانی کی پلیٹیں مفت میں ملنے لگیں، جس کی وجہ سے اس پیشکش کا فائدہ اٹھانے کے لیے ایک بہت بڑا ہجوم امنڈ پڑا۔ جیسے ہی اس پیشکش کے مناظر سوشل میڈیا پر وائرل ہوئے، قطار میں اضافہ ہوتا گیا اور لوگ بریانی کی پلیٹ لینے کے لیے قطار میں آگے بڑھنے کے لیے دھکا مکی کرتے نظر آئے۔

اس سے پہلے کہ ریستوران کے مالک کا سامان ختم ہوتا، ہجوم پر قابو پانے کے لیے پولیس کو بلانا پڑا۔ صورتحال اس وقت کشیدہ ہو گئی جب قطار میں کھڑے لوگوں نے ریستوران کے مالک سے مزید بریانی کا بندوبست کرنے کا مطالبہ شروع کر دیا۔ آخر کار، مالک کو مزید توڑ پھوڑ سے بچنے کے لیے اپنا ریستوران بند کرنا پڑا۔

اسٹیشن انچارج، کوتوالی دیہات منوج کمار پانڈے نے بتایا کہ چونکہ ریستوران کے باہر ایک بڑا ہجوم جمع ہو گیا تھا، اس لیے کسی بھی طرح کی امن و امان کی صورتحال بگڑنے سے بچانے کے لیے پولیس ٹیم تعینات کرنی پڑی۔