تیسرا ٹیسٹ: ’دھونی کے گھر‘ میں کلین سویپ کرنے اترے گی ٹیم انڈیا

رانچی، 16 اکتوبر (یواین آئی) ہندوستان اور جنوبی افریقہ کے درمیان تیسرے اور آخری ٹیسٹ میچ کے لئے ہندوستانی ٹیم کے پانچ اور جنوبی افریقہ کی پوری ٹیم رانچی پہنچ چکی ہے۔ ہندوستان اور جنوبی افریقہ کے بیچ 19 اکتوبر سے رانچی کے جے ایس سی اے بین الاقوامی اسٹیڈیم میں سیریز کا تیسرا اور آخری مقابلہ کھیلا جائے گا۔ تیسرا مقابلہ سابق ہندوستانی کپتان مہندر سنگھ دھونی کے گھریلو میدان میں کھیلا جائے گا اور ٹیم انڈیا کا ہدف دھونی کے گھر میں کلین سویپ کرنا ہوگا۔

ہندوستانی ٹیم کی جانب سے مینک اگروال، چتیشور پجارا، روی چندرن اشون، ایشانت شرما اور هنوما وهاري رانچی پہنچے ہیں جبکہ کپتان وراٹ کوہلی اور دیگر کھلاڑی جمعرات اور جمعہ تک رانچی پہنچیں گے۔ ذرائع کے مطابق وراٹ، روہت شرما اور اجنکیا رہانے پونے سے ممبئی روانہ ہو چکے ہیں اور وہ جمعرات کو رانچی پہنچیں گے۔

ہندوستانی ٹیم نے جنوبی افریقہ کو وشاکھاپٹنم اور پونے میں پہلے دو ٹیسٹ میچوں میں شکست دے کر سیریز میں صفر۔دو کی ناقابل تسخیر برتری حاصل کرلی ہے اور تیسرے ٹیسٹ میں اس کا ہدف تین۔صفر سے کلین سویپ کرنا ہوگا۔ جے ایس سی اے بین الاقوامی اسٹیڈیم میں یہ دوسرا ٹیسٹ میچ ہوگا۔ اس میدان پر پہلا ٹیسٹ ہندوستان اور آسٹریلیا کے درمیان مارچ 2017 میں کھیلا گیا اور دلچسپ بات یہ ہے کہ وہ بھی سیریز کا تیسرا ٹیسٹ میچ تھا۔

آسٹریلیا نے پہلی اننگز میں 451 رن بنائے تھے جبکہ ہندوستان نے چتیشور پجارا کے 202 اور ردھمان ساہا کے 117 رنز کی بدولت اپنی پہلی اننگز نو وکٹ پر 603 رن بنا کر ڈکلیئر کردی تھی۔ آسٹریلیا نے دوسری اننگز میں چھ وکٹ پر 204 رن بنا کر میچ ڈرا کرا لیا تھا۔ اس میدان پر جنوبی افریقہ کا یہ پہلا میچ ہوگا۔جنوبی افریقہ نے اس میدان پر کوئی ون ڈے یا ٹی -20 میچ نہیں کھیلا ہے۔ جنوبی افریقہ کی ٹیم اس میدان پر ہر حال میں واپسی کی کوشش کرے گی۔