متحدہ عرب امارات میں 19 ستمبر سے 10 نومبر تک ہوگا آئی پی ایل

نئی دہلی: انڈین پریمیر لیگ (آئی پی ایل) کا 13واں سیشن متحدہ عرب امارات (یو اے ای) میں 19 ستمبر سے 10 نومبر تک منعقد ہوگا اور اس مرتبہ آئی پی ایل میں ہر ٹیم میں کھلاڑیوں کی تعداد چوبیس تک ہوگی۔ ہندوستانی کرکٹ کنٹرول بورڈ (بی سی سی آئی) کے سکریٹری جے شاہ نے آئی پی ایل کی گورننگ کونسل کی ویڈیو کانفرنسنگ کے ذریعہ میٹنگ کے بعد سرکاری آفیشیل بیان جاری کرکے بتایا کہ ٹورنامنٹ یو اے ای میں ہوگا اور اس کے میچ یو اے ای کے تین شہروں، دوبئی، ابوظہبی اور شارجہ میں کھیلے جائیں گے۔

سمجھا جاتا ہے کہ ٹورنامنٹ کو وزارت کھیل کی ہری جھنڈی مل گئی ہے اور وزارت داخلہ اور وزارت خارجہ کی منظوری جلد ملنے کی امید ہے۔ آئی پی ایل کی گورننگ کونسل کی اتوار کو ہوئی میٹنگ میں یہ فیصلہ کیا گیا کہ اس مرتبہ آئی پی ایل کی ہر ٹیم میں 24 کھلاڑی ہوں گے۔ آئی پی ایل فائنل 10 نومبر کو کھیلا جائے گا اور شام کے میچ پہلے کے مقابلے آدھا گھنٹہ پہلے شروع ہوں گے۔

گورننگ کونسل کے صدر برجیش پٹیل نے گزشتہ 21 جولائی کو اعلان کیا تھا کہ آئی پی ایل کو 19 ستمبرسے یو اے ای میں کرایا جائے گا۔ بی سی سی آئی نے متحدہ عرب امارات کرکٹ بورڈ کو آئی پی ایل کے انعقاد کے لئے اپنی رضامندی کا خط بھی حوالے کردیا تھا اور اسے حکومت ہند کی منظوری کا انتظار تھا۔ انڈین بورڈ کو بالآخر حکومت کی منظوری مل گئی، جس کے بعد اب 19 ستمبر سے آئی پی ایل کا یو اے ای میں انعقاد کیا جائے گا۔ آئی پی ایل یو اے ای کے تین شہروں دوبئی، ابوظہبی اور شارجہ میں منعقد کیے جائیں گے۔