جنوبی افریقہ-ونڈیز کے درمیان میچ بارش کی نذر، دونوں ٹیموں کو ملا ایک ایک پوائنٹ 

ساؤتھمپٹن: جنوبی افریقہ اور ویسٹ انڈیز کے درمیان آئی سی سی عالمی کپ 2019 کا مقابلہ بارش کے سبب منسوخ کردیا گیا۔ میچ منسوخ ہونے سے دونوں ٹیموں کو ایک ایک پوائنٹ ملا۔

اس عالمی کپ میں یہ دوسرا مقابلہ ہے جو بارش کی وجہ سے منسوخ ہوا ہے۔ اس سے قبل 7 جون کو برسٹل میں پاکستان اور سری لنکا کا مقابلہ بارش کی نذر ہوگیا تھا اور دونوں ٹیموں کو ایک ایک پوائنٹ ملا تھا۔ اس میچ کے رد ہوجانے سے جنوبی افریقہ کو ٹورنامنٹ میں 3 میچوں میں شکست کے بعد یہ ایک پوائنٹ ملا ہے۔

ویسٹ انڈیز کا تین میچوں میں یہ پہلا میچ تھا جو رد رہا اور اس کے اب تین پوائنٹ ہوگئے ہیں۔ اس مقابلے میں ویسٹ انڈیز نے ٹاس جیت کر پہلے فیلڈنگ کرنے کا فیصلہ کیا اور میچ میں 7.3 اوور کے بعد بارش آنے سے پھر کھیل ممکن نہیں ہوسکا تھا۔

جنوبی افریقہ نے اس دوران دو وکٹ کھوکر 29 رن بنائے تھے۔ شیلڈن کوٹرول نے ہاشم آملہ (6) اور ایڈم مرکرم (5) کے وکٹ حاصل کئے۔ کوئنٹن ڈی کاک 17 اور کپتان فاف ڈوپلیسس صفر پر ناٹ آؤٹ رہے تھے۔

بانرش بند ہونے کے بعد دونوں امپایروں نے میدان کا جائزہ لیا لیکن انہیں میدان کی صورت حال کھیل کے لئے بہتر نظر نہیں آئی اور میچ کو یہیں پر ختم کرنے کا فیصلہ لیا گیا۔ میچ کے منسوخ ہونے کی وجہ سے دونوں ٹیموں کو ایک ایک پوئنٹ فراہم کیا گیا۔

(یو این آئی ان پٹ کے ساتھ)