ٹی-20 ورلڈ کپ کے فائنل میں پہنچا جنوبی افریقہ، افغانستان کو شکست دے کر رقم کی تاریخ

ٹی-20 ورلڈ کپ 2024 کے پہلے سیمی فائنل میں جنوبی افریقہ نے افغانستان کو شکست دے کر فائنل میں رسائی حاصل کر لی۔ ٹی-20 ورلڈ کپ کی تاریخ میں یہ پہلا موقع ہے جب افریقی ٹیم فائنل میں کھیلنے جا رہی ہے۔ ہدف کے تعاقب میں افریقہ نے میچ میں یک طرفہ فتح درج کی۔ افریقہ نے 67 گیندوں اور 9 وکٹوں باقی رہتے ہدف کا تعاقب کر لیا۔

ٹرینیڈاڈ کے برائن لارا اسٹیڈیم میں کھیلے گئے میچ میں افغانستان نے ٹاس جیت کر پہلے بیٹنگ کا فیصلہ کیا جو ان کے لیے مکمل طور پر غلط ثابت ہوا۔ پہلے بیٹنگ کرنے آئی افغانستان کی ٹیم 11.5 اوورز میں صرف 56 رن کے اسکور پر افریقی گیندبازوں کے ہاتھوں آل آؤٹ ہو گئی۔ اس دوران مارکو یانسن اور تبریز شمسی نے ٹیم کی جانب سے سب سے زیادہ 3-3 وکٹیں حاصل کیں۔ پھر ہدف کا تعاقب کرتے ہوئے افریقہ نے 8.5 اوورز میں ایک وکٹ کے نقصان پر 60 رن بنا کر کامیابی حاصل کی۔ اس طرح افریقہ باآسانی جیت کر فائنل میں پہنچ گیا۔

اگرچہ 57 رن کے چھوٹے ہدف کا تعاقب کرتے ہوئے جنوبی افریقہ کی شروعات خراب رہی لیکن ٹیم نے یک طرفہ فتح حاصل کی۔ افریقہ کو پہلا جھٹکا دوسرے اوور کی پانچویں گیند پر کوئنٹن ڈی کاک کی صورت میں لگا، جنہیں فضل الحق فاروقی نے بولڈ کیا۔ ڈی کاک نے 8 گیندوں میں ایک چوکے کی مدد سے صرف 5 رن بنائے۔ تاہم اس کے بعد افریقہ نے کوئی وکٹ نہیں گنوائی۔

اس کے بعد دوسری وکٹ کے لیے ریزا ہینڈرکس اور کپتان ایڈن مارکرم نے 55 رن (43 گیند) کی ناقابل شکست شراکت داری کی اور ٹیم کو آسانی سے جیت کی دہلیز تک پہنچا دیا۔ ریزا ہینڈرکس نے 25 گیندوں میں 3 چوکوں اور ایک چھکے کی مدد سے 29 رن (نابعد) اور کپتان مارکرم نے 21 گیندوں میں 4 چوکوں کی مدد سے 23 رن (نابعد) اسکور کئے۔

افریقی آل راؤنڈر مارکو یانسن کو میچ میں شاندار باؤلنگ کرنے پر 'پلیئر آف دی میچ' منتخب کیا گیا۔ انہوں نے مخالف ٹیم کو ابتدائی بڑے جھٹکے دیے۔ جس کی وجہ سے افغان ٹیم آخر تک سنبھل نہ سکی۔ ٹیم کے لیے انہوں نے 3 اوور کرائے اور 16 رن دے کر 3 کامیابیاں حاصل کیں۔

قبل ازیں، ٹاس جیت کر پہلے بیٹنگ کرتے ہوئے افغانستان کی ٹیم 11.5 اوورز میں تمام وکٹوں کے نقصان پر 56 رن بنانے میں کامیاب رہی۔ عظمت اللہ عمرزئی ٹیم کے واحد بلے باز تھے جو افریقی گیندبازوں کے خلاف دوہرے ہندسہ تک پہنچ سکے۔ چوتھی پوزیشن پر بیٹنگ کرتے ہوئے انہوں نے 12 گیندوں پر 10 رن کی اننگز کھیلی۔ ان کے علاوہ ٹیم کے دیگر بلے باز صرف ایک ہندسے میں آؤٹ ہو گئے۔ مارکو یانسن اور تبریز شمسی کے 3-3 وکٹوں کے علاوہ کاگیسو ربادا اور اینریک نورکیا نے 2-2 وکٹیں حاصل کیں۔