دوسرا ٹیسٹ: رہانے کی کپتانی والی سنچری، ہندوستان کو نمایاں برتری حاصل

میلبورن: کپتان اجنکیا رہانے (104 ناٹ آؤٹ) کی ذمہ دار کپتانی والی سنچری اور ان کے آل راؤنڈر رویندر جڈیجہ (40 ناٹ آؤٹ) کے ساتھ چھٹے وکٹ کے لئے 104 رن کی ناٹ آؤٹ شراکت داری کی بدولت ہندوستان نے آسٹریلیا کے خلاف دوسرے باکسنگ ڈے ٹسٹ کے دوسے دن اتوار کو پانچ وکٹ پر 277 رن بناکر پہلی اننگز میں 82 رن کی اہم برتری حاصل کرلی۔

رہانے نے اپنے کیریئر کی 12 ویں اور بطور کپتان پہلی سنچری اسکور کی۔ رہانے کا یہ بطور کپتان تیسرا ٹیسٹ ہے اور یہ سنچری ایسے وقت میں آئی ہے جب ہندوستان کو اس کی اشد ضرورت تھی۔ ہندوستان پہلا ٹیسٹ ہار گیا، ایڈیلیڈ میں ان کی دوسری اننگز ان کے کم ترین اسکور 36 تک سمٹ گئی اور باقاعدہ کپتان وراٹ کوہلی جنوری میں اپنے پہلے بچے کی ولادت کی وجہ سے وطن واپس ہوگئے ہیں۔

32 سالہ رہانے نے اس طرح کے مشکل حالات میں جنگجو کی طرح محاذ سنبھال کر سنچری والی اننگز کھیلی۔ رہانے نے پیٹ کمنس کو چار چوکے لگاکر اپنی سنچری مکمل کی۔ رہانے کے سنچری مکمل کرتے ہی پورے ہندوستانی کیمپ میں سبھی نے اپنی جگہ پر کھڑے ہوکر اپنے کپتان کا اس شاندار اننگز پرتالیاں بجاتے ہوئے خیرمقدم کیا۔

اگرچہ رہانے کو اپنی سنچری میں دو زندگیاں بھی ملیں، لیکن انہیں چھوڑ دیا گیا تو اس سنچری کو غیر ملکی سرزمین پر ہندوستان کی بہترین سنچریوں میں شمار کیا جائے گا۔ رہانے اسٹمپ تک 200 گیندوں میں ناٹ آؤٹ 104 رن میں 12 شاندار چوکے لگا چکے ہیں۔ جڈیہ 104 گیندوں میں ایک چوکے کی مدد سے 40 رنز بنا کر کریز پر موجود ہیں۔ دونوں کے درمیان چھٹے وکٹ کے لئے 194 گیندوں میں 104 رنز کی ناٹ آؤٹ شراکت داری ہوچکی ہے۔

ہندوستان کی پہلی اننگز میں نوجوان اوپنر شبھمن گل نے 45، چیتشور پجارا نے 17، ہنوما وہاری نے 21 اور وکٹ کیپر رشبھ پنت نے 29 رنز بنائے۔ آسٹریلیا کی جانب سے مشل اسٹارک اور پیٹ کمنس نے دو، دو اور ناتھن لیون نے ایک وکٹ حاصل کیا۔

رہانے کو ان کی اننگز میں دو زندگیاں ملیں جن کا افسوس آسٹریلیا کو رہے گا۔ دونوں دفعہ بدقسمت بالر مشل اسٹارک تھے۔ اسٹیون اسمتھ نے رہانے کا پہلی بار سلپ پر کیچ چھوڑا، تب ان کا اسکور 73 رن تھا۔ دوسری بار ان کا کیچ 104 رنز کے اسکور پر ٹریوس ہیڈ نے چھوڑ دیا۔ ہیڈ نے گیند کو پکڑ لی تھی لیکن ہاتھ زمین سے ٹکراتے ہی گیند ہاتھوں سے نکل گئی۔ اس زندگی ملنے کے فوراً بعد ہی، بارش ہوگئی اور دوسرے دن کا کھیل بھی ختم ہوگیا۔

رہانے کی اننگز مکمل طور پر بے داغ رہی اور انہوں نے وراٹ کی کمی محسوس نہیں ہونے دی۔ رہانے نے ہندوستان کے تین وکٹ محض 64 رن پر گرجانے کے بعد ہنوما کے ساتھ چوتھے وکٹ کے لئے 52 رنز، پانچویں وکٹ کے لئے 57 رنز اور جڈیجہ کے ساتھ چھٹے وکٹ کے لئے 104 رن کی ناٹ آؤٹ شراکت داری کی۔

رہانے نے ایک سرے سے ہندوستانی اننگز کو مضبوطی سے سنبھالے رکھا اور اپنے ساتھی کی حوصلہ افزائی بھی کی۔ رہانے نے 50 رن 111 گیندوں میں پانچ چوکوں کی مد سے اور 100 رن 195 گیندوں میں 11 چوکوں کی مدد سے پورے کیے۔