ویراٹ کے ساتھ آخری ٹی-20 میں اوپننگ کرنے اترنا ایک حکمت عملی کا فیصلہ تھا: روہت

نئی دہلی: ہندوستان کے نائب کپتان روہت شرما نے کہا کہ ویراٹ کوہلی کا انگلینڈ کے خلاف ٹی-20 میچ میں ان کے ساتھ اننگ کا آغاز کرنا صرف حکمت عملی کا قدم تھا۔ روہت شرما کے صحافیوں سے بات کرنے سے قبل وراٹ کوہلی نے کہا تھا کہ وہ آئندہ انڈین پریمئر لیگ (آئی پی ایل) میں بھی اننگ کا آغازکریں گے اور اس سال کے آخر میں ہندوستان میں ہونے والے ٹی-20 ورلڈ کپ میں بھی ٹاپ آرڈر میں کھیلنا چاہیں گے۔

روہت شرما نے پانچ میچوں کی سیریز کے اختتام کے بعد کہا کہ ’’ٹی-20 ورلڈ کپ میں ابھی کافی وقت ہے، تب ہماری بلے بازی کیسی ہوگی، اس پر بات کرنا ابھی قبل از وقت ہوگا۔ ہمیں بیٹھ کر طے کرنا ہوگا کہ ٹیم کے لئے سب سے مناسب کیا رہے گا۔ انہوں نے کہا کہ پانچویں ٹی-20 میں وراٹ سے اننگ کا آغاز کرانا حکمت عملی تھی، کیونکہ ہم اضافی گیند باز ٹیم میں رکھنا چاہتے تھے اور ایک بلے باز کو باہر کرنا چایتے تھے اور بدقسمتی سے راہل کو باہر بیٹھنا پڑا تھا۔

انہوں نے کہا کہ ’’راہل محدود اووروں میں خاص طور پر اس فارمیٹ میں ہمارے اہم کھلاڑی ہیں۔ موجودہ فارم کو دیکھتے ہوئے ٹیم مینجمنٹ نے سب سے بہتر الیون کے ساتھ اترنے کا فیصلہ کیا۔ اس کا مطلب یہ نہیں ہے کہ مستقبل میں راہل کے نام پر غور نہیں کیا جائے گا۔ روہت نے کہا کہ ’’یہ صرف ایک میچ کے لئے تھا۔ جب ورلڈ کپ قریب ہوگا تو چیزیں تبدیل ہوسکتی ہیں۔ سیریز سے پہلے وراٹ کوہلی نے کہا تھا کہ روہت اور راہل ان کی پہلی پسند کی سلامی جوڑی ہیں۔