ممبئی نے 27 سال بعد ایرانی کپ پر کیا قبضہ، ڈبل سنچری بنانے والے سرفراز خان بنے پلیئر آف دی میچ

اجنکیا رہانے کی کپتانی میں ممبئی کو آج اس وقت ایک بار پھر بڑی کامیابی حاصل ہوئی جب ایرانی کپ کا خطاب اپنے نام کر لیا۔ ممبئی نے ریسٹ آف انڈیا کو پہلی اننگ میں ملی سبقت کی بنیاد پر شکست دی اور اس کے ساتھ ہی 27 سال بعد ایرانی کپ پر قبضہ کیا۔ دراصل یہ میچ ڈرا ہوا، لیکن ایسی حالت میں جس ٹیم کے پاس پہلی اننگ میں سبقت ہوتی ہے اسے فاتح قرار دیا جاتا ہے۔ ممبئی نے پہلے بلے بازی کرتے ہوئے 537 رن بنائے تھے اور اس کے بعد ریسٹ آف انڈیا کو 416 رنوں پر روک دیا تھا۔ یعنی پہلی اننگ میں ممبئی کو 121 رنوں کی سبقت ملی تھی۔ ممبئی کی پہلی اننگ کے ہیرو سرفراز خان تھے جنھوں نے ناٹ آؤٹ 222 رن بنائے تھے۔ یہی وجہ ہے کہ انھیں پلیئر آف دی میچ کے ایوارڈ سے نوازا گیا۔

میچ کے چوتھے دن کا کھیل جب ختم ہوا تھا تو لگ رہا تھا کہ ریسٹ آف انڈیا کی ٹیم اس میچ میں جیت حاصل کر لے گی۔ اسٹمپس تک ممبئی کا اسکور 6 وکٹ کے نقصان پر 153 رن تھا۔ لیکن پانچویں دن تنوش کوٹیان نے شاندار اننگ کھیل کر ناٹ آؤٹ سنچری بنائی اور ٹیم کو سنبھالا۔ ان کی اس اننگ نے یقینی بنایا کہ ممبئی کی ٹیم کم اسکور پر آؤٹ نہیں ہوگی۔ تنوش نے ناٹ آؤٹ 114 رن بنائے جس میں انھوں نے 150 گیندوں کا سامنا کرتے ہوئے 10 چوکے اور ایک چھکا لگایا۔ آخر میں ان کا موہت اوستھی نے بہترین ساتھ دیا جنھوں نے 93 گیندوں پر 4 چوکے اور ایک چھکا کی مدد سے ناٹ آؤٹ 51 رن بنائے۔

ایک طرف جہاں سرفراز نے پہلی اننگ میں ممبئی کے لیے ڈبل سنچری اسکور کی تھی، تو وہیں ریسٹ آف انڈیا کی طرف سے ابھمنیو ایشورن نے پہلی اننگ میں 292 گیندوں پر 191 رنوں کی شاندار اننگ کھیل کر اپنی ٹیم کی امیدیں زندہ رکھی تھیں۔ وہ ڈبل سنچری بنانے سے محروم رہ گئے اور پھر ان کے آؤٹ ہونے کے بعد ٹیم بہت زیادہ دیر تک بلے بازی بھی نہیں کر سکی۔ دھرو جریل کی ضرور تعریف کرنی ہوگی جنھوں نے 121 گیندوں پر 93 رن بنائے اور انھوں نے ایشورن کے ساتھ 165 رنوں کی شراکت داری بھی کی تھی۔