دھونی میرے پسندیدہ کھلاڑیوں میں سے ایک تھے : وسیم اکرم

پاکستان کرکٹ ٹیم کے سابق کپتان وسیم اکرم نے کہا ہے کہ مہندر سنگھ دھونی ایسا کھلاڑی تھا جو آیا، کھیلا اور فتح حاصل کر لی۔پاکستان اور انگلینڈ کے درمیان جاری سیریز کے دوران کمنٹری کے لیے ساؤتھمپٹن میں موجود وسیم اکرم کی جانب سے بھی دھونی کی ریٹائرمنٹ پر تبصرہ سامنے آیا ہے۔

سوئنگ کے سلطان نے اپنے ایک بیان میں کہا کہ بھارتی کرکٹ ٹیم کے سابق کپتان مہندر سنگھ دھونی میرے پسندیدہ کھلاڑیوں میں سے ایک تھے۔ انھوں نے کہا کہ دھونی ایسا کھلاڑی تھا جو آیا، کھیلا اور فتح حاصل کر لی۔

وسیم اکرم کا کہنا تھا کہ ایم ایس دھونی نے بطور کپتان بھارت کو ورلڈکپ، ٹی ٹوئنٹی اور چیمپئنز ٹرافی جتوائی۔ سابق کپتان نے کہا کہ دھونی نڈر کھلاڑی تھا جو حریف سے ڈرنا نہیں جانتا تھا۔ قبل ازیں سابق بھارتی کپتان مہندر سنگھ دھونی نے سوشل میڈیا پر اپنی ریٹائرمنٹ کا اعلان کیا تھا۔