ٹی -20 ورلڈ کپ ملتوی ہونے سے آئی پی ایل کا راستہ صاف ہو سکتا ہے: ٹیلر

آسٹریلیا کے سابق کپتان مارک ٹیلر کا کہنا ہے کہ اس سال اکتوبر-نومبر میں آسٹریلیا میں ہونے والا ٹی -20 ورلڈ کپ اگر ملتوی کیا جاتا ہے تو آئی پی ایل کے انعقاد کا راستہ صاف ہو سکتا ہے۔

کورونا وائرس کے خطرے کی وجہ سے دنیا بھر میں کرکٹ سرگرمیاں ٹھپ پڑی ہیں اور اس سال ہونے والے ٹی -20 ورلڈ کپ کے انعقاد کو خطرہ پیدا ہو گیا ہے۔ کورونا کی وجہ سے ہندستان میں لاک ڈاؤن کے سبب 29 مارچ سے شروع ہونے والے آئی پی ایل کے 13 ویں سیزن کو ہندوستانی کرکٹ کنٹرول بورڈ (بی سی سی آئی) نے غیر معینہ مدت کے لئے ملتوی کر دیا ہے۔

کرکٹ آسٹریلیا (سی اے) کے چیف ایگزیکٹو آفیسر کیون رابرٹس نے حال ہی میں کہا تھا کہ ٹی -20 ورلڈ کپ کے بارے میں آخری فیصلہ اگست سے پہلے نہیں ہو پائے گا اور اس کی تصویر 28 مئی کو بین الاقوامی کرکٹ کونسل (آئی سی سی) بورڈ کی میٹنگ کے بعد صاف ہوگی۔

ٹیلر نے کہا کہ میرے خیال سے ٹی -20 ورلڈ کپ ملتوی کیا جا سکتا ہے کیونکہ 15 ٹیموں کو آسٹریلیا کا دورہ کرنا ہوگا اور سات مقامات پر 45 میچوں کا اہتمام کرنا ہو گا۔تازہ صورتحال میں بیرون ملک کا دورہ کرنا انتہائی مشکل ہے اور اس کے بعد یہاں پہنچنے پر 14 دنوں کے لئے كوارنٹين میں رہنے سے اس کا ہونا اور بھی مشکل ہے۔

ٹیلر نے کہا کہ اگر آئی سی سی ٹی -20 ورلڈ کپ کے لیے ملتوی کر دے تو بی سی سی آئی کے لئے آئی پی ایل منعقد کرانے کو لے کر راستہ صاف ہو سکتا ہے جس سے ذمہ داری ذاتی کھلاڑی پر آجائے گی کہ وہ سفر کرنا چاہتا ہے یا نہیں۔ورلڈ کپ میں تو پوری ٹیم کو دوسرے ملک کا سفر کرنا پڑے گا۔

سابق کپتان نے کہا کہ ظاہر ہے کہ سی اے ٹی -20 ورلڈ کپ منعقد کرنا چاہتا ہے لیکن وہ اس کے بارے میں بھی بات کر رہا ہے کہ اس کے کھلاڑی آئی پی ایل کے لئے ہندستان جائیں گے یا نہیں۔وہ چاہتے ہیں کہ ہندستان آسٹریلیا آئے۔میرے خیال سے ابھی بہت کچھ ہونا باقی ہے۔

انہوں نے کہا کہ میرے خیال سے کرکٹ کو وقت ملا ہے اور انہیں اب منصوبہ تیار کرنا چاہئے۔مجھے اس بات پر کوئی شک نہیں کہ سی اے اب آئی پی ایل کا بارے میں سوچ رہا ہے اور شاید ٹی -20 ورلڈ کپ کے بارے میں نہیں سوچ رہا۔

ٹیلر نے کہا کہ وہ چاہتے ہیں کہ ہندستان آسٹریلیا کا دورہ کرے اس کے لئے انہوں نے ایڈیلیڈ اوول میں چار ٹیسٹ میچ کرانے کو لے کر بات چیت کی ہے۔میرے خیال سے یہ ممکن ہے اور اگر یہاں میچ منعقد ہوتے ہیں تو اسٹیڈیم کے قریب ہوٹل بھی مل سکتا ہے۔