ہندوستان کی خاتون ٹیم نے آخری ون ڈے میں نیوزی لینڈ کو دی چھ وکٹوں سے شکست

کوئنس ٹاؤن: اسمرتی مندھانا (71)، ہرمن پریت کور (63) اور کپتان متھالی راج (57) کی شاندار نصف سنچریوں کی بدولت ہندوستانی خواتین کرکٹ ٹیم نے جمعرات کو یہاں پانچویں اور آخری ون ڈے میں نیوزی لینڈ کو چھ وکٹوں سے شکست دے دی اور ہندوستان کو کلین سویپ ہونے سے بچایا۔ تاہم نیوزی لینڈ نے سیریز 4-1 سے جیت لی۔

میزبان نیوزی لینڈ نے ٹاس جیت کر بیٹنگ کا فیصلہ کیا اور آل راؤنڈر امیلیا کار کی نصف سنچری اور دیگر بلے بازوں کی نمایاں شراکت کے ساتھ 50 اوورز میں 9 وکٹوں پر 251 رنز کا مشکل ہدف بنایا۔ جواب میں ہندوستان نے اسمرتی، ہرمن پریت اور کپتان متھالی کی نصف سنچریوں کی بدولت 46 اوور میں چار وکٹ پر 255 رنز بنا کر میچ جیت لیا۔ اسمرتی نے 84 گیندوں پر نو چوکوں کی مدد سے 71، ہرمن پریت نے چھ چوکوں اور ایک چھکے کی مدد سے 66 گیندوں پر 63 اور متھالی نے چھ چوکوں کی مدد سے 66 گیندوں پر ناٹ آؤٹ 57 رنز بنائے۔

نیوزی لینڈ کی جانب سے امیلیا کار نے 75 گیندوں پر چھ چوکوں کی مدد سے 66 ر، کپتان سوفی ڈیوائن نے 41 گیندوں پر دو چوکوں اور ایک چھکے کی مدد سے 34 رنز جبکہ لارین ڈاؤن اور ہیلی جینسن نے 30-30 رنز بنائے۔ بالنگ میں ہیلی جینسن، ہنا رو، فران جوناز اور امیلیا کارنے ایک ایک وکٹ حاصل کی۔

ہندوستان کی جانب سے راجیشوری گائیکواڈ، دیپتی شرما اور اسنیہ رانا نے دو دو جبکہ میگھنا سنگھ اور پونم یادو نے ایک ایک وکٹ حاصل کی۔ اسمرتی مندھانا کو 71 رنز کی میچ جیتنے والی اننگز کے لئے مین آف دی میچ اور نیوزی لینڈ کی امیلیا کار کو پوری سیریز میں 353 رنز بنانے اور سات وکٹیں لینے پر ’پلیئر آف دی سیریز‘ قرار دیا گیا۔