کورونا کے دور میں یجویندر چہل دیکھ رہے شادی کا خواب، چاہتے ہیں 3 خوبیوں والی بیوی

اس وقت کورونا وائرس نے پورے ہندوستان کو گھروں میں قید رہنے کے لیے مجبور کر دیا ہے۔ غریب مزدور ہوں یا کوئی امیر ہستی، بالی ووڈ اداکار ہوں یا کوئی کھلاڑی، سبھی گھر میں اپنے اپنے طریقے سے وقت گزار رہے ہیں۔ اس لاک ڈاؤن کے دوران ہندوستانی کرکٹ ٹیم کے مشہور اسپن گیندباز یجویندر چہل شادی کا خواب دیکھ رہے ہیں اور ایک میڈیا اہلکار سے بات کرتے ہوئے یہ بھی بتایا کہ وہ اپنی بیوی میں کون سی تین خوبیاں چاہتے ہیں۔

دراصل ایک ہندی نیوز پورٹل پر شائع خبر میں بتایا گیا ہے کہ یجویندر چہل نے جتن سپرو سے بات چیت کے دوران میٹریمونیل یعنی شادی کے اشتہار کے بارے میں پوچھے جانے پر یہ انکشاف کیا کہ وہ کس طرح کی لڑکی کو اپنی شریک حیات بنانا چاہتے ہیں۔ انھوں نے کہا کہ میں ایک ایسی بیوی چاہتا ہوں جو مجھے سمجھے، میری روٹین کو سمجھے اور میرے ساتھ ٹک ٹاک بنائے۔ چہل نے ساتھ ہی یہ بھی کہا کہ ٹک ٹاک والی خوبی سب سے اہم ہے۔

قابل ذکر ہے کہ یجویندر چہل کرکٹ کے میدان پر اپنی کلائی کا ہنر دکھانے کے علاوہ اپنے ویڈیوز اور ٹک ٹاک سے سبھی کو ہنسانے کا بھی کام کرتے ہیں۔ شریک حیات کے لیے جب ان کی پسند کے بارے میں پوچھا گیا تو ایسے وقت میں بھی انھوں نے کچھ مزاحیہ انداز اختیار کیا۔ انھوں نے اپنی ہونے والی شریک حیات میں تین خوبی ہونے والی بات تو کہی، لیکن ساتھ میں یہ بھی جوڑ دیا کہ "میں خود تو ٹام کروز نہیں ہوں جو بہت زیادہ امید رکھوں۔" لیکن اس درمیان انھوں نے یہ ضرور کہا کہ وہ اپنی بیوی سے یہ امید رکھیں گے کہ گھر والوں کی عزت کرے۔